قازاقستان مۇسىلماندارى ءدىني باسقارماسى رامازان ايىنا دەيىن اراق ىشكەن ادامنىڭ ورازاسى قابىل بولا ما دەگەن سۇراققا قاتىستى ءپاتۋا جاريالادى، دەپ حابارلايدى aqshamnews.kz
قمدب وكىلدەرىنە سەنسەك، شىن تاۋبە ەتسە، رامازان ايىنان بۇرىن اراق ىشكەن ادامنىڭ ورازاسى اراق ىشپەي ورازا تۇتقان ادامنىڭ ورازاسىنداي قابىل بولادى.
«اراق-شاراپ ءىشۋ – دىنىمىزدە حارام، ۇلكەن كۇنا سانالادى»، - دەپ جازعان ءمۇفتيات بۇعان قاتىستى قۇران اياتتارىن مىسالعا كەلتىرگەن.
«پايعامبارىمىز (وعان اللانىڭ سالاۋاتى مەن سالەمى بولسىن): «كىمدە-كىم اراق ىشەتىن بولسا، ونىڭ قىرىق كۇندىك نامازى قابىل بولمايدى» دەگەن. تاعى ءبىر حاديستە: «كىم اراق ىشسە، ونىڭ قىرىق كۇندىك نامازى قابىل بولمايدى. ەگەر تاۋبە ەتسە، اللا ونىڭ تاۋبەسىن قابىل ەتەدى. ودان كەيىن تاعى دا اراق ىشسە، اللا ونىڭ قىرىق كۇن نامازىن قابىل ەتپەيدى. ەگەر تاۋبە ەتسە، اللا تاۋبەسىن قابىل ەتەدى. بۇدان كەيىن تاعى اراق ىشسە، اللا ونىڭ تاعى دا قىرىق كۇندىك نامازىن قابىلدامايدى. بۇل ىسىنە تاۋبە ەتسە، تاۋبەسى قابىل ەتىلەدى. ال ءتورتىنشى رەت تاعى دا اراق ىشسە، اللا ونىڭ قىرىق كۇندىك نامازىن قابىل ەتپەيدى. ەگەر تاۋبە ەتسە، اللا ونىڭ تاۋبەسىن قابىل ەتپەيدى دە ونى «ءحابال» (توزاقتىقتاردىڭ ىرىڭىنەن جينالعان) وزەنىنەن سۋسىنداندىرادى» دەلىنگەن»، - دەپ جازعان ءمۇفتيات.
ال، رامازان ايىنىڭ قارساڭىندا ىشىمدىك ءىشۋدىڭ ۇكىمى تۋرالى جازعان ءمۇفتيات «ورازا ۇستاۋشى رامازان ايىنان ەكى كۇن بۇرىن اراق ءىشىپ، سوڭىنان شىنايى تاۋبە ەتسە، اللا ونىڭ تاۋبەسىن قابىل ەتەدى. ونىڭ ورازاسى اراق ىشپەي ورازا تۇتقان ادامنىڭ ورازاسىنداي بولادى. ال ورازا ۇستاپ اراق ءىشۋىن دوعارماسا، ورازاسى دۇرىس بولادى، ءبىراق ساۋابى بولمايدى. اراق ىشكەنى ءۇشىن كۇنا ارقالايدى» دەگەن ءپاتۋا شىعارىپ وتىر.