قاسيەتتى رامازان ايىندا اسقازانىڭىزعا كۇش تۇسىرمەيتىن، دەنساۋلىققا پايدالى تاماقتاردى ىشكەن دۇرىس. وزدەرىڭىز بىلەتىندەي، ورازادا مۇسىلمانداردىڭ اس ءىشۋ رەجيمى وزگەرەدى. اشتىقتى سەزىنبەي، السىرەمەۋ ءۇشىن سارەسىن جىبەرمەي، مىندەتتى تۇردە تاماقتانعان ابزال.
«سارەسىنى ىشىڭدەر! راسىندا سارەسىندە بەرەكە بار» دەيدى يسلام عۇلامالارى. وسى رەتتە كۇنى بويى اعزاڭىزعا كۇش بەرەتىن تاعامدار جايلى ايتساق دەيمىز.
جالپى، ادام بالاسى ورازا ۇستاۋدى باستاعان كەزدە، اينالاسى 1 اپتانىڭ ىشىندە اعزادا گليۋكوزانىڭ ءبولىنۋى وزگەرە باستايدى ەكەن. مۇنىڭ اسەرىنەن ادامنىڭ باسى اينالىپ، السىرەۋى ابدەن مۇمكىن. ءبىراق اينالاسى 4-5 كۇندە ورگانيزم بەيىمدەلىپ، كەشكى ساعات 19.00-20.00-دە اس ىشۋگە ۇيرەنە باستايدى. اس-مازىرىڭىزدە مىندەتتى تۇردە اقۋىزدارعا باي تاعامدار بولعانى دۇرىس.
مىسالى، ەت، بۇرشاق، جاڭعاق، بوتقا، كومىرسۋلار بولعانى ابزال. مامانداردىڭ پىكىرىنشە، كۇردەلى كومىرسۋلاردى كوبىرەك تۇتىنۋ كەرەك. ياعني بوتقانىڭ بارلىق ءتۇرى، كوكونىستەر مەن جەمىس-جيدەكتەر جاتادى. سونداي-اق، قولدىڭ مايىن، سۇيىق ماي، ءزايتۇن مايلارىن دا قولدانعان ءجون. وسىلايشا ىشەكتىڭ جۇمىسىن جاقسارتۋعا دا كۇش سالاسىز. سارەسىدە مايلار مەن اقۋىزدارعا كوڭىل ءبولىڭىز. مىسالى، شۇجىق، جىلقىنىڭ ەتى، جۇمىرتقا، قولدىڭ سارى مايى قوسىلعان بوتقانى ىشسەڭىز، كۇنى بويى توق جۇرەسىز. اۋىزاشار كەزىندە تويىپ تاماقتانباۋعا تىرىسۋ كەرەك. اسقازانىڭىزعا جەڭىل بولۋ ءۇشىن الدىمەن سۋ مەن قۇرمادان ءدام تاتىڭىز، 15 مينۋت تاماقتانىڭىز. از-ازدان جەگەن اسىڭىز بويىڭىزعا سىڭىمدىرەك بولماق. اۋىز اشقاننان كەيىن بارىنشا ءجيى ءارى كوبىرەك سۋ ءىشۋ كەرەك.
دۇرىس تاماقتانۋ ارقىلى يممۋنيتەتتى كۇشەيتە الامىز. ورازا اياقتالعان سوڭ كۇنىنە 5-6 رەت از-ازدان تاماقتانۋ كەرەك. سونداي-اق، فاست-فۋد تاعامدارىن ازايتىڭىز. تاعامدى قورىتامىن دەگەن نيەتپەن كومىرسۋ، گازدالعان سۋسىندى ىشپەڭىز. سەبەبى، ەندى عانا كۇندەلىكتى تاماققا ۇيرەنىپ كەلە جاتقان اسقازانعا اۋىرلىق ءتۇسىرۋى مۇمكىن. كينو كورگەندە، اڭگىمە اراسىندا كيريەشكي، چيپسي، ءتاتتى تاعامداردان ءوزىڭىزدى شەكتەڭىز. ونىڭ ورنىنا كەپتىرىلگەن جەمىستەر، قىتىرلاق ناندار جەڭىز. كوكتەم – ادام اعزاسىنىڭ السىرەپ، دارۋمەن تاپشىلىعىنىڭ پايدا بولاتىن شاعى. بيىل جىلدىڭ بۇل مەزگىلى قاسيەتتى رامازان ايىمەن تۇسپا-تۇس كەلدى. سول سەبەپتەن دۇرىس تاماقتانۋ ارقىلى دەنساۋلىعىڭىزدى ساقتاڭىز.
اۋىزاشارعا ارنالعان تاعامدار:
- تالقان، تارى؛
- كۇرىشتەن جاسالعان جەڭىل تاعام؛
- قاراقۇمىق، قۇرما؛
- س ۇلى جارماسى؛
- تابيعي شىرىندار: مورس، كاركادە، كومپوت؛
- كوكونىستەر؛
- كەپتىرىلگەن كوكونىستەر؛
- جالبىز شايى، كوك شاي؛
- ءسۇت ونىمدەرى؛
- ەت، قۇس ەتى، بالىق.
مامان كەڭەسى
سالتانات بولاتبەك قىزى، كاسىبي ديەتولوگ:
سۋدى كوبىرەك ءىشىڭىز
ءار ادامنىڭ ىشكى قورى بار. بۇل – بۇيرەك، باۋىر مەن اسقازان مايلارى. ال ىشتەگى ماي 80% سۋدان تۇرادى. سۋ ىشپەگەندىكتەن، ورازانىڭ العاشقى كۇندەرى ورگانيزم قينالۋى مۇمكىن. ءبىراق ارى قاراي اعزا مۇنى تۇسىنەدى دە، كۇندىز سۋ مولشەرىن ىشكى قوردان الادى. وسىلايشا اعزادا وزدىگىنەن تازالانۋ پروسەسى جۇرەدى. كەي ادام وسى ساتتە ارىقتايدى. ال دۇرىس تاماقتانباعاندار، كەرىسىنشە، تولادى.
ەڭ الدىمەن، اۋىز اشقان سوڭ، اعزاداعى سۋ مولشەرىن قالىپقا كەلتىرۋدى ويلاڭىز. اۋىزاشاردا بولمە تەمپەراتۋراسىمەن 0،5-1 ل اراسىندا سۋ ءىشۋ كەرەك. بۇل العاشقى 20 مينۋتتا بولعانى ءجون. سۋدى بىردەن ىشۋگە بولمايدى. اسىقپاي، جايمەن ءىشىڭىز. سۋ نەلىكتەن بولمە تەمپەراتۋراسىندا بولۋى كەرەك؟ سەبەبى، سالقىن سۋ ىشەتىن بولساق، ول اسقازاندا تۇرىپ قالادى دا، ىشەككە قاراي وتپەيدى. ياعني سۋدى دەنە تەمپەراتۋراسىمەن بىردەي بولعانشا كۇرەسىپ، اسقازاندا ۇستايدى. ال ءبىز اۋىز اشقان سوڭ ىشكەن تاماعىمىز سۋمەن ارالاسادى دا، قويمالجىڭ فورماعا ەنىپ، تاماق دۇرىس قورىتىلمايدى. وسىلايشا ورازادا اعزا تازالانۋدىڭ ورنىنا، تاماق توكسينگە اينالىپ، اسقازاندا جينالادى.
مۇنىڭ ارتى يممۋنيتەتتىڭ تۇسۋىنە اكەلەدى. اسقازان-ىشەك جولدارىنىڭ جۇمىسى بۇزىلادى. ءىش قاتادى، سالماق قوساسىز. مىنە، وسىنىڭ ءبارى سۋدى دۇرىس ىشپەگەننىڭ اسەرى. ەستە ساقتاڭىز، سارەسىنە دەيىن تاعى 1 ليتر سۋ ءىشۋ كەرەك. وسىلايشا كۇنىنە 2 ليتر سۋ ءىشۋ نورماسىن ورىندايمىز.