«بۇلاق كورسەڭ، كوزىن اش» دەگەن ۇستانىمعا بەرىك مەنىڭ ۇستازدىق عۇمىرىمدا 5-سىنىپتان باستاپ جەتەكشىلىك ەتەتىن 11 «گ» سىنىبى ايرىقشا ورىن الادى. «اقىلدى تەنتەكتەردىڭ» اساۋ ارىنىن مەن ادەبيەت پەن ونەر ارقىلى تاربيەلەۋگە تىرىستىم.
شاكىرتتەرىمنىڭ بويىندا جىلت ەتىپ كورىنگەن دارىندى قولداپ، ساعىن سىندىرماي سەنىم بىلدىرگەنىمدە وقۋشىلارىم وڭ تۇستارىمەن تانىلا باستادى. سىنىپتاعى ءار وقۋشىم — «سەگىز قىرلى، ءبىر سىرلى» ونەرلى بالالار. دەگەنمەن، وقۋشىلارىمنىڭ ىشىندەگى ەڭ زەرەگى – رايىمبەك نۇرداۋلەت. رايىمبەك — جاسىنداي جارقىلداعان وتكىر، تاڭعى شىقتاي جانى تازا، پوەزياعا قۇمار، اقىلى زەرەك، رايىمبەك بابانىڭ رۋحىمەن قاناتتانعان جاس تالاپ. العاش سىنىبىما كەلگەندە «تەنتەك» ءتىزىمىنىڭ كوشىن باستاپ جۇرگەن بالا ەدى. رايىمبەكتى تاربيەلەگەن — اباي مەن مۇقاعاليدىڭ ولمەس رۋھى، وشپەس مۇراسى. مۇقاعاليدىڭ «رايىمبەك! رايىمبەك!» پوەماسىن جاتتاعالى ءبىزدىڭ رايىمبەكتىڭ ساناسىن ەسىمى ارناپ قويىلعان ۇلى اتاسىنداي ەل قورعانى بولار ەر بولۋ ارمانى جاۋلادى. سودان بەرى جىگەرلى جاس تالاي رەت مەكتەپىشىلىك، اۋداندىق، قالالىق، رەسپۋبليكالىق دەڭگەيدەگى مانەرلەپ وقۋ سايىستارىنىڭ جۇلدەگەرى اتاندى. مەكتەپىشىلىك مانەرلەپ وقۋ سايىسىنان ەكى رەت باس جۇلدەنى يەمدەنسە، جامبىل كىتاپحاناسىندا بولعان سايىستان ەكىنشى ورىن الدى. مۇقاعالي مەن اباي ولەڭدەرىن جاتقا بىلەتىن ورەن قالالىق «اباي وقۋلارىندا» جۇلدەلى ءۇشىنشى ورىنعا يە بولدى. بويىنداعى كۇش-قۋاتىن ونەر-بىلىم جولىنا بۇرعان رايىمبەك — بۇگىندە قىزىل اتتەستاتقا ۇمىتكەر ۇزدىك وقۋشى.
«ونەرلى ورگە جۇزەر» دەمەكشى، رايىمبەك شىعارماشىلىق شارالاردىڭ بەلسەندى قاتىسۋشىسى، مەكتەپ ماقتانىشىنا اينالدى. اكتەرلىق قابىلەتى كوز سۇيسىندىرەتىن دارىندى جاس — مەكتەپشىلىك «اقساراي» تەاترىنىڭ بەلدى مۇشەسى. تابيعاتىنان مىنەزى اشىق-جارقىن جەتكىنشەك، ۇتقىر ازىلدەرىمەن كوپشىلىكتىڭ كوڭىلىن كوتەرە بىلەدى، وسى قاسيەتىنە وراي ول — مەكتەپشىلىك كۆن كلۋبىنىڭ بەلدى مۇشەسى جانە التىن ۇيامىزداعى كۆن ويىندارىنىڭ چەمپيونى.
ەسىمى تۇتاس ەلدىڭ ۇرانىنا اينالعان باباسىنىڭ اتىن ارداقتاعان جاس بولاشاقتا ەلىنىڭ گۇلدەنۋىنە ۇلەس قوساتىن تۇلعا بولۋدى ارماندايدى. كەلەشەگىنەن كوپ ءۇمىت كۇتتىرەتىن شاكىرت ءقازىر «قازاقستاننىڭ جاس پاتريوتتارى» ۇيىمىنىڭ پرەزيدەنتى. «ءوزىڭ ءۇشىن ەڭبەك قىلساڭ، ءوزى ءۇشىن وتتاعان حايۋاننىڭ ءبىرى بولاسىڭ؛ ادامشىلىقتىڭ قارىزى ءۇشىن ەڭبەك قىلساڭ — اللانىڭ سۇيگەن ق ۇلىنىڭ ءبىرى بولاسىڭ» دەگەن حاكىم ابايدىڭ وسيەتىن جادىنا ۇستاعان جاس ۇرپاق الاشقا ادال قىزمەت ەتۋدى كوكسەيدى.
ارماندارىڭ الاسارماسىن، سەنىڭ شىعار شىڭىڭنىڭ بيىك بولارىنا ۇستازدىق جۇرەگىممەن سەنىم بىلدىرەمىن، رايىمبەك!