گازەتىمىزدىڭ الدىڭعى نومىرلەرىندە راديوفوبيا ۇعىمى جانە ونىڭ قوعامعا زيانى تۋرالى توقتالىپ وتكەنبىز. بۇل ماسەلەنى ەلىمىزدە قىزمەت كورسەتەتىن بايلانىس وپەراتورلارى دا ايتىپ وتىر. اتاپ ايتقاندا، «Beeline» برەندىمەن قىزمەت كورسەتەتىن «كار-تەل» كومپانياسى تۇرعىندار شاعىمى سالدارىنان الماتىنىڭ قانداي تۇرعىن ۇيلەرىندە ينتەرنەت ساپاسىنىڭ تومەن نەمەسە مۇلدەم جوق ەكەنىن حابارلادى.
اتالمىش كومپانيا ب ا ق وكىلدەرىنە ارنالعان كەزدەسۋ ۇيىمداستىرىپ، بايلانىس سالاسى جانە راديوفوبيا تۋرالى مالىمەتتەرمەن ءبولىستى. كومپانيا دەرەكتەرىنە سۇيەنسەك، 2022 جىلى تۇرعىندار شاعىمى بويىنشا 340 بايلانىس ستانسياسى مۇلدەم الىنىپ تاستالعان نە باسقا ورىنعا كوشىرىلگەن. ال 2021 جىلى ادامدار قارسىلىعى سالدارىنان جوسپارلانعان بايلانىس ستانسيالارىنىڭ 40 پايىزى ۋاقىتىندا ورناتىلماعان جانە بۇگىندە ءوز ۋاقىتىندا ورناتىلماعان 627 ستانسيانىڭ جابدىقتارى قويمالاردا تۇر. سونداي-اق، كومپانيا وكىلدەرى ءاربىر ءۇشىنشى بايلانىس ستانسياسىنىڭ قۇرىلىسى قارسىلىققا تاپ بولاتىنىن ايتادى.
ۇيالى بايلانىس وپەراتورىنىڭ ماماندارى راديوفوبيا ماسەلەسى اۋىلدارعا قاراعاندا ءىرى قالالاردا كەزدەسەتىنىن ايتادى.
– شالعاي اۋىلداردا ادامدار 2G نە 3G جىلدامدىعىمەن وتىرادى. ولار ءبىز بارساق، قۋانا قارسى الادى. ءتىپتى بايلانىس ستانسياسى ورناتىلعاندا اۋىل بولىپ توي جاسايتىن جاعدايلار دا كەزدەسكەن. ءبىر قىزىعى – قالا جانە اۋدان ورتالىقتارىنىڭ تۇرعىندارى راديوفوبياعا كوبىرەك بەيىم بولىپ كەلەدى. راديوفوبيادان باستى زارداپ شەگىپ وتىرعان الماتى جانە استانا قالالارى، – دەدى «كار-تەل» جەلىسىن پايدالانۋ ءبولىمىنىڭ باسشىسى رۋسلان ايۋپوۆ.
كومپانيا وكىلى بايلانىس ستانسياسىنان قورقىپ، ونى ورناتۋعا قارسىلىق بىلدىرگەن جانە سونىڭ سالدارىنان ينتەرنەت بايلانىسى جوق نە جىلدامدىعى تومەن الماتىداعى تۇرعىن ءۇي كەشەندەرىن تانىستىرىپ ءوتتى. ولار:
- «Alma city» تك؛
- «Alma city-5» تك؛
- «ۆەرنىي» تك؛
- «بەرەكە» تك؛
- «شاحريستان» تك؛
- «سەزام» تك؛
- «ءالىم» تك؛
- «Samal Tower» تك؛
- «تري بوگاتىريا» تك
- «جۇلدىز-1»، «جۇلدىز-2»، «وربيتا»، «تاستاق»، «جاس قانات» ىقشاماۋداندارى.
– قۇرىلىس جۇرگىزۋشى كومپانيالار نەمەسە ميب (مۇلىك يەلەرىنىڭ بىرلەستىگى) ءتوراعالارى بىزدەن ينتەرنەت قوسىپ بەرۋىمىزدى سۇرايدى. ءبىز وعان كەلىسىپ، جاڭا تۇرعىن ۇيلەردىڭ شاتىرىنا شاعىن بايلانىس ستانسيالارىن ورناتامىز. ءبىراق ءبىراز ۋاقىت وتكەن سوڭ، سول ءۇيدىڭ تۇرعىندارى شاعىم جاساپ ءبىزدىڭ قۇرىلعىلاردى الىپ تاستايدى. جاقىندا مۇنداي جاعداي الماتىداعى «4YOU» تۇرعىن ءۇي كەشەنىندە ورىن الدى. ءۇي تۇرعىندارى بايلانىس ستانسياسىن بارلىق توك كوزدەرىنەن ءوز بەتتەرىنشە اجىراتىپ تاستاعان، ءارى ءبىزدىڭ كومپانياعا ەسكەرتپەگەن. بۇگىنگى كۇنى بۇل جەردە تۇراتىن ادامدار قايتادان ينتەرنەت ءالسىز ەكەنىنە شاعىمدانىپ وتىر، – دەپ اتاپ ءوتتى ر.ايۋپوۆ.
سونداي-اق، ول جالعان اقپاراتقا سەنىپ، بايلانىس ستانسيالارىن الىپ تاستاۋ سالدارىنان تۇرعىنداردىڭ وزدەرى زارداپ شەگەتىنىن ءتۇسىندىرىپ ءوتتى.
– كەي تۇرعىندار بايلانىس ستانسيالارىن ءۇيدىڭ جەرتولەسىنە نەمەسە ۇيدەن اۋلاق جەرگە ورناتۋىمىزدى سۇراپ جاتادى. ءبىراق مۇنداي جاعدايدا ءبىزدىڭ ستانسيالاردان ەشقانداي پايدا بولمايدى. بايلانىس ستانسيالارى جاقسى جۇمىس ىستەۋى ءۇشىن ەشقانداي كەدەرگىسىز بىر-بىرىنە قاراپ تۇرۋى كەرەك. ونىڭ الدىن ءبىر نارسە شەكتەيتىن بولسا، بايلانىس جەلىلەرى ودان وتە المايدى. سونداي-اق، ايتىلعان ستانسيالاردى ءتيىستى ورىنعا ەمەس، ۇيدەن الىس جەرگە ورناتاتىن بولساق، وندا ينتەرنەت تۇرعىن ۇيدە ەمەس، باسقا جەردە بولاتىنىن تۇسىنبەي جاتادى. تۇپتەپ كەلگەندە، شاعىم جازىپ، بازالىق ستانسيالاردى الىپ تاستاعاننان كەيىن تۇرعىنداردىڭ وزدەرى زارداپ شەگەدى، – دەپ تۇسىندىرەدى ول.
«كار-تەل» جەلىسىن پايدالانۋ ءبولىمىنىڭ باسشىسى قاۋەسەت سوزگە ەرىپ، راديوفوبياعا سەنۋدىڭ قاجەتى جوق ەكەنىن ايتادى.
– وسى ورايدا، ۇيالى بايلانىس وپەراتورلارى ءۇشىن وتە قاتال تالاپتار قويىلاتىنىن ايتا كەتكەن ءجون. بىزدە سانتيمەترىنە 10 ميكروۆاتت سوققى رۇقسات ەتىلگەن. امەريكا، ەۋروپا ەلدەرىندە بۇل تالاپ 100 نە ودان كوپ بولۋى مۇمكىن. ياعني بىزدەگى قۋاتتىلىق 10 ەسە از. ادامدارعا جىلدام ينتەرنەت بولعانى ۇنايدى، ءبىراق وعان وزدەرى قارسى ارەكەت جاسايدى. تۇرعىندار قولدارىنداعى تەلەفون بازالىق ستانسيامەن ءبىر بايلانىس جەلىسىندە جۇمىس ىستەيتىنىن ءتۇسىنۋى قاجەت، – دەيدى رۋسلان ايۋپوۆ.