الماتىداعى باكاد ايماعىنان نارەستە تابىلدى. بالا اربادا بولعان. بۇل تۋرالى Almaty-akshamy.kz حابارلايدى.
تابىلعان بالانىڭ ۆيدەوسىن TikTok جەلىسىندە جاريالاعان اۆتور ءسابيدى باكاد-تىڭ بەسىنشى شاقىرىمىندا جولىقتىرعانىن ايتادى.
"كىشكەنتاي بالانى دالاعا تاستاپ كەتتىپتى. جۇمىستان ۇيگە جاياۋ كەلە جاتقانبىز. جۇرگەنىمىزگە 40 مينۋت، ءتىپتى ءبىر ساعاتتاي بولدى. ءسابي ءالى جىلامادى، كۇلىمسىرەپ جاتىر. قۇجات جوق، ەشتەڭە جوق. ءۇش-تورت ايلىق بولۋى كەرەك.
ەشكىمگە ايتپاي-اق قويايىق پا؟ اناڭ مەن اكەڭ قايدا؟ ولار ونى وسى كوپىردىڭ استىنا قالدىرىپ كەتكەن. مىنە، باكاد، مىنە، كوپىر. سونىڭ استىنا قالدىرىپ كەتكەن"، - دەيدى ۆيدەو اۆتورى.
الماتى وبلىسىنىڭ پوليسيا دەپارتامەنتى 15 مامىر كۇنى ساعات 10:08 شاماسىندا كامەلەتكە تولماعان بالانىڭ تابىلعانى تۋرالى حابارلاما تۇسكەنىن حابارلادى.
"بۇل اقپارات قاراساي اۋداندىق پوليسياسىنا تىركەلدى. بۇل فاكتىنى تەكسەرۋ بارىسىندا وقيعا ورنىنا دەرەۋ پوليسيا جاساعى جونەلتىلىپ، كوپ ۇزاماي بالانىڭ اناسى انىقتالدى. اناعا قاتىستى ق ر اقبتك-نىڭ 127-بابىنىڭ 1-بولىگى بويىنشا اكىمشىلىك حاتتاما تولتىرىلدى. اتا-انالارمەن تۇسىندىرمە سيپاتتاعى پروفيلاكتيكالىق اڭگىمە جۇرگىزىلىپ، ولار ق ر قىلمىستىق كودەكسىنىڭ جانە اكىمشىلىك قۇقىق بۇزۋشىلىق تۋرالى كودەكسىنىڭ باپتارىمەن تانىستىرىلدى"، - دەپ حابارلادى پوليسەيلەر.