ۇكىمەت جەر قويناۋىن پايدالانۋشىلارعا بەرىلگەن كەلىسىمشارتتار مەن ليسەنزيالاردى قايتا قاراپ جاتىر
قازاقستان رەسپۋبليكاسى پرەمەر-مينيسترىنىڭ ءبىرىنشى ورىنباسارى رومان سكليار قاتتى پايدالى قازبالار مەن كومىرسۋتەك شيكىزاتىنىڭ كەن ورىندارىن تەكسەرۋ ماسەلەسى جونىندە كەڭەس وتكىزدى. بۇل تۋرالى ۇكىمەتتىڭ سايتى حابارلادى.
ۇكىمەت جەر قويناۋىن پايدالانۋشىلارعا بەرىلگەن كەلىسىمشارتتار مەن ليسەنزيالاردى قايتا قاراۋ بويىنشا جۇيەلى جۇمىس جۇرگىزۋدە. وسىلايشا، تالداۋ بارىسىندا ۋاكىلەتتى ورگاندار مىندەتتەمەلەرىن دۇرىس ورىنداماي وتىرعان قاتتى پايدالى قازبالارعا قاتىستى 148 جانە كومىرسۋتەك شيكىزاتىنا قاتىستى 27 كەلىسىمشارتتى انىقتادى.
ءتيىستى جول كارتاسى اياسىندا توقتاتۋ تۋرالى ءتيىستى حابارلامالار جىبەرىلەتىن شارتتار مەن ليسەنزيالاردى انىقتاۋ جوسپارلانۋدا.
وسى جۇمىستاردىڭ ناتيجەسىندە كەن ورىندارى جاڭا ينۆەستورلارعا بەرۋ ءۇشىن اۋكسيونعا شىعارىلادى.
اۋكسيوندا جەر قويناۋىن پايدالانۋ قۇقىعىن ۇسىنۋ بارلىق مۇددەلى ينۆەستورلاردىڭ قاتىسۋىنا تەڭ مۇمكىندىك بەرەدى.
اۋكسيونداردى وتكىزۋ تۋرالى اقپارات مەملەكەتتىك ورگانداردىڭ رەسپۋبليكالىق باسپا باسىلىمدارىندا جانە ينتەرنەت-رەسۋرستارىندا مىندەتتى تۇردە ورنالاستىرىلادى.
قابىلدانىپ جاتقان شارالاردىڭ قورىتىندىسى بويىنشا جەر قويناۋىن پايدالانۋ سالاسىنا، ءبىرىنشى كەزەكتە قاتتى پايدالى قازبالار كەن ورىندارىن يگەرۋ بويىنشا ينۆەستيسيالار اعىنى ۇلعايادى.
ۇكىمەتتىڭ وسى باعىتتاعى جۇمىسى جالعاستىرىلادى.