دەنساۋلىق ساقتاۋ سالاسىنىڭ ماماندارى قىزىلشانىڭ الدىن الۋدىڭ جالعىز ءتيىمدى جولى ۆاكسيناسيا دەپ سانايدى
الماتى قالاسىندا العاشىندا قىزىلشا جۇقتىرۋدىڭ 91 كۇدىكتى جاعدايى تىركەلگەن، ونىڭ 73ء-ى زەرتحانالىق راستالعان. قىزىلشا ينفەكسياسىنىڭ الدىن الۋدىڭ جالعىز ءتيىمدى جولى - ۆاكسيناسيا. مۇنداي اقپاراتتى وڭىرلىك كوممۋنيكاسيالار قىزمەتىنىڭ بريفينگىندە قوعامدىق دەنساۋلىق ساقتاۋ باسقارماسىنىڭ وكىلدەرى مەن قالا ەپيدەميولوگتارى ايتتى، دەپ حابارلايدى almaty-akshamy.kz
قىزىلشا – اۋا-تامشىلى ينفەكسيالار توبىنا جاتاتىن ءجىتى جۇقپالى ۆيرۋستىق اۋرۋ. اۋرۋ ادامنان ادامعا اۋا ارقىلى، تىنىس الۋ جولدارىنان بولىنەتىن تامشىلارمەن نەمەسە جۇقتىرعان ادامداردىڭ مۇرنىنان نەمەسە تاماعىنان بولىنەتىن زاتتارمەن تىكەلەي بايلانىستا بولۋدان جۇعادى.
«قىزىلشانىڭ زەرتحانالىق راستالعان 73 جاعدايىنىڭ 56-سى (76،7%) دەر كەزىندە قىزىلشاعا قارسى ەگىلمەگەن، ونىڭ ىشىندە 25 (50،0%) اتا-اناسىنىڭ ەكپەدەن باس تارتۋىنا بايلانىستى، 16 (28،6%) مەديسينالىق قارسى كورسەتىلىمدەرگە بايلانىستى، 7 ادام(12،5%) – ۆاكسيناسيا جاسىنا جەتپەۋىنە بايلانىستى جانە 6 (9،6%) ەرەسەك ادام – بەلگىسىز يممۋندىق ستاتۋسى بار»، – دەدى الماتى قالاسى سانيتارلىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى اسەل قالىقوۆا.
سپيكەر الماتى قالاسىنداعى قىزىلشا اۋرۋىنىڭ ەپيدەميولوگيالىق احۋالىنا كوشى-قون ۇدەرىسى اسەر ەتكەنىن اتاپ ءوتتى.
قوعامدىق دەنساۋلىق ساقتاۋ باسقارماسىنىڭ مالىمەتى بويىنشا، الماتىدا ۆاكسيناسيا الماعان 14 884 بالا بار، ونىڭ ىشىندە 1-6 جاس ارالىعىنداعى 6 124 بالا، 7-17 جاس ارالىعىنداعى 8 760 بالا، ونىڭ ىشىندە ءتۇرلى سەبەپتەرگە بايلانىستى ەكپەدەن باس تارتقان 5688 بالا بار.
«اتا-انالاردى بالالارىنىڭ دەنساۋلىعىنا بەي-جاي قاراماۋعا شاقىرعىم كەلەدى. بالالار اراسىنداعى قىزىلشامەن سىرقاتتانۋشىلىقتىڭ تومەندەۋىنە قازاقستان رەسپۋبليكاسىنىڭ ۇلتتىق ەكپە كۇنتىزبەسىنە سايكەس جوسپارلى يممۋنداۋ عانا ىقپال ەتەتىنىن اتاپ وتكەن ءجون. حالىق اراسىندا يممۋندىق ەمەس قاباتتىڭ تومەندەۋى حالىقتىڭ بۇل ينفەكسياعا بەيىمدىلىگىن ايتارلىقتاي تومەندەتەدى»، - دەپ تولىقتىردى قوعامدىق دەنساۋلىق ساقتاۋ باسقارماسى باسشىسىنىڭ ورىنباسارى نازگۇل يمانعالييەۆا.
ماماندار قىزىلشا جۇقپاسى مەن اۋرۋدىڭ اسقىنۋىنىڭ الدىن الۋدىڭ بىردەن-بىر ءتيىمدى جولى ەكپە ەكەنىن ايتادى. ماسەلەن، وتكەن جىلى پروفيلاكتيكالىق ءىس-شارالار كەشەنىنىڭ ناتيجەسىندە الماتى قالاسىندا اۋرۋشاڭدىق بويىنشا ەپيدەميولوگيالىق جاعدايدى تۇراقتاندىرۋعا جانە اۋرۋدىڭ تىركەلۋىن ءبىرلى-جارىم عانا جاعدايعا دەيىن تومەندەتۋگە مۇمكىندىك تۋدى.
اۋرۋدىڭ العاشقى بەلگىلەرى - جوتەل، دەنە قىزۋىنىڭ كوتەرىلۋى، كوزدەن جاس اعۋ، جارىققا سەزىمتالدىق جانە باستاپقىدا بەتتە، قۇلاق ارتىندا، كەيىن بۇكىل دەنەدە پايدا بولاتىن بورتپە. ولار پايدا بولعان كەزدە سىزگە:
- ءوز بەتىنشە ەمدەلۋگە بولمايدى، دارىگەردى ۇيگە شاقىرىپ، ەمدى دارىگەردىڭ نۇسقاۋلىعىمەن الۋ؛
- ۇيدە بولۋ، جۇمىس ورنىنا، سونداي-اق، قوعامدىق ورىندارعا بارماۋ؛
- ناۋقاس بالالاردى مەكتەپتەرگە، بالالارعا ارنالعان مەكتەپكە دەيىنگى مەكەمەلەرگە جىبەرۋگە بولمايدى.
قىزىلشاعا قارسى ەكپە ەكى رەت جۇرگىزىلەدى: 1 جاستا جانە 6 جاستا، بۇل ۆاكسيناسيادان كەيىنگى يممۋنيتەتتى دامىتۋعا مۇمكىندىك بەرەدى، بۇل ۆاكسيناسيالانعان ادامداردا ءومىر بويى بولادى.
ۆاكسيناسيا ءۇشىن ددۇ سەرتيفيكاتتالعان جانە قازاقستان رەسپۋبليكاسىندا تىركەلگەن قىزىلشاعا، قىزامىققا، پاروتيتكە قارسى بىرىكتىرىلگەن ۆاكسينا قولدانىلادى. ۆاكسيناسيا تۇرعىلىقتى جەرى بويىنشا قالالىق ەمحانالاردىڭ بارلىق ەكپە كابينەتتەرىندە تەگىن جۇرگىزىلەدى.