قىزىلشا نەگە ءورشىپ كەتتى؟

دسم مۇنىڭ سەبەبىن ءتۇسىندىردى.

دەنساۋلىق ساقتاۋ ءبىرىنشى ۆيسە-مينيسترى تيمۋر سۇلتانعازييەۆتىڭ ايتۋىنشا، بيىل قازاقستاندا قىزىلشا دەرتىن جۇقتىرعاندار سانى 11 مىڭنان اسقان، دەپ حابارلايدى Almaty-akshamy.kz

«جالپى سىرتقانتتانعانداردىڭ 83%-ى – 0-14 جاسقا دەيىنگى بالالار. ولاردىڭ باسىم بولىگى (85%-ى) – ەكپە الماعان بالالار. الماتى، شىمكەنت قالالارىندا جانە الماتى، جامبىل وبلىستارىندا ماسەلە وتە وزەكتى. ۆاكسينا الماعانداردىڭ باسىم بولىگىنىڭ ەكپەگە قارسى كورسەتىلىمى بار نەمەسە كەيبىرەۋلەرى الەۋمەتتىك جەلىلەردەن بۇرىس اقپارات كورىپ العان. وسىعان بايلانىستى ەكپە الۋدان باس تارتۋ دەرەگى تىركەلەدى»، - دەدى تيمۋر سۇلتانعازييەۆ سەناتتىڭ جالپى وتىرىسىنان سوڭ.

سونداي-اق ول قىزىلشا نەگە بۇل وڭىرلەردە ورشىگەنىن ءتۇسىندىردى.

«بۇل ايماقتاردا حالىق تىعىز قونىستانعان جانە تۋۋ كوەففيسيەنتى جوعارى. سوندىقتان قىزىلشا جۇقتىرعاندار سانىنىڭ ءوسۋى بايقالىپ وتىر»، - دەدى ءبىرىنشى ۆيسە-مينيستر.

تيمۋر سۇلتانعازييەۆتىڭ پىكىرىنشە، كوروناۆيرۋس كەزىندە قىزىلشاعا قارسى ەكپە سالۋ جۇمىسى جۇرگىزىلمەگەن. سالدارىنان وسىنداي ماسەلە تۋىنداعان.

قىزىلشا دەرتىن جۇقتىرعاندار سانىنىڭ ءوسۋى تەك قازاقستاندا ەمەس، الەمدە تىركەلىپ وتىر. نەگىزگى سەبەپتەردىڭ ءبىرى، بۇرىن ايتىلعانداي، كوروناۆيرۋس كەزىندە باسقا اۋرۋلارعا قارسى ۆاكسينانىڭ جۇرگىزىلمەۋى، - دەدى ول.

بۇگىندە دسم جاعدايدى دۇرىستاۋ ءۇشىن بالالارعا ەكپە سالۋعا كىرىسكەن.

«قازاقستاننىڭ باس مەملەكەتتىك سانيتار دارىگەرى ايجان ەسماماعامبەتوۆا 6 ايدان 11 ايعا دەيىنگى سابيلەرگە ۆاكسينا سالۋ تۋرالى شەشىم قابىلدادى. سونىمەن قاتار 2 جاستان 5 جاسقا دەيىنگى بالالارعا دا قوسىمشا ەكپە سالىنادى»، - دەپ تۇيىندەدى ءسوزىن تيمۋر سۇلتانعازييەۆ.