ءۇش كۇن ىشىندە فرانسۋز دەلەگاسياسى الماتىنىڭ ءبىرقاتار جوعارى وقۋ ورىندارىن ارالايدى.
قازاقستان مەن فرانسيانىڭ جوعارى وقۋ ورىندارىنىڭ وكىلدەرى حالىقارالىق عىلىمي ىنتىماقتاستىقتى دامىتۋ پەرسپەكتيۆالارىن انىقتاپ، قازاقستاندا جۇمىس ىستەيتىن فرانسۋز كومپانيالارىنىڭ ينجەنەرلەر مەن تەحنيكتەرگە دەگەن قاجەتتىلىگى تۋرالى اقپاراتپەن ءبولىسۋدى، «بولاشاق» باعدارلامالارى مەن عىلىمي تاعىلىمدامادان ءوتۋ شارتتارى تۋرالى كوبىرەك ءبىلۋدى، سونداي-اق Erasmus+ باعدارلاماسى اياسىندا فرانسيا ۋنيۆەرسيتەتتەرى مەن قازاقستان ۋنيۆەرسيتەتتەرى اراسىنداعى ىنتىماقتاستىق مۇمكىندىكتەرىن تالقىلاۋدى جوسپارلاپ وتىر، دەپ حابارلايدى Almaty-akshamy.kz.
كەشە ساتبايەۆ ۋنيۆەرسيتەتىندە وتكەن دوڭگەلەك ۇستەل جيىنىندا فرانسيا مەن قازاقستاننىڭ عالىمدارى مەن وقىتۋشىلارى گەولوگيا جانە ەنەرگەتيكا سالاسىندا كادرلار دايارلاۋ بويىنشا تاجىريبە الماسىپ، الداعى ىنتىماقتاستىق قارىم-قاتىناستىڭ جوسپارىن ايقىندادى.
فرانسياداعى I2EN ينجەنەرلىك مەكتەبىنىڭ ديرەكتورى كارەن دايفۋكۋدىڭ ويىنشا، ەكى ەلدىڭ جوعارى ءبىلىم جانە عىلىم سالاسىنداعى بولاشاق ىنتىماقتاستىق بايلانىسى ستۋدەنتتەرمەن الماسۋدى جانە ءوزارا عىلىمي ىس-ارەكەتتى ىنتالاندىرۋى كەرەك:
«ساتبايەۆ ۋنيۆەرسيتەتىندە يادرولىق ينجەنەريا سالاسىندا قوس ديپلومدىق ءبىلىم بەرۋ باعدارلاماسىن ىسكە قوسۋعا ءبىز دايىنبىز. بۇل دارىندى ينجەنەرلەرگە قاجەتتى داعدىلاردى مەڭگەرۋگە جانە قازاقستاندا اتوم ەنەرگەتيكاسىن دامىتۋعا سەپتىگىن تيگىزەدى»، - دەدى كارەن دايفۋكۋ.
فرانسيانىڭ قازاقستان رەسپۋبليكاسىنداعى باس كونسۋلى فابريس نيەۆو مىرزا ءوزىنىڭ جاۋاپ سوزىندە قازاقستاندىق جانە فرانسۋز ۋنيۆەرسيتەتتەرى اراسىنداعى ىنتىماقتاستىق قارىم-قاتىناس ودان ءارى داميتىنىن اتاپ ءوتتى:
«كەشە استانادا ماكرون مىرزا قازاقستاندىق جوعارى وقۋ ورىندارىنىڭ ستۋدەنتتەرىمەن كەزدەستى. بۇل فرانسۋزدار مەن قازاقتاردىڭ ءبىلىم مەن عىلىمعا دەگەن قۇشتارلىعىندا ورتاق قاسيەت كوپ ەكەنىن كورسەتەدى»، – دەدى نيەۆو مىرزا ءوز سوزىندە.
فورۋم اياسىندا فرانسيا جوعارى وقۋ ورىندارى وكىلدەرىنىڭ دەلەگاسياسى الماتىدا NARXOZ ۋنيۆەرسيتەتىنىڭ، ءال-فارابي اتىنداعى قازاق ۇلتتىق ۋنيۆەرسيتەتىنىڭ جانە اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ قىزمەتىمەن تانىسادى.