تۇركيادا دەمالعان ەكى قىزىلوردالىق ءمۇعالىمنىڭ باسى داۋعا قالدى.
ولار قىسقى كانيكۋل كەزىندە شەتەلگە بارىپ دەمالۋدى ءجون كورگەن، دەپ حابارلايدى Almaty-akshamy.kz Zhasalash.kz-كە cىلتەمە جاساپ.
شەتەل اسقان مۇعالىمدەر وزدەرىنىڭ دەمالىسىن الەۋمەتتىك جەلى ارقىلى كورسەتىپ وتىرعان. ەڭ سوراقىسى، پەداگوگتار شەتەلدە ءجۇرىپ، بىرنەشە مارتە ترانسۆەستيتتەر كلۋبىندا كوڭىل كوتەرگەن. ۇستازداردىڭ بۇل ارەكەتىن اتا - انالار الەۋمەتتىك جەلىلەر ارقىلى كورىپ، ۇستازداردىڭ مەكتەپتەن كەتۋىن تالاپ ەتكەن.
بەيادەپ قىلىق كورسەتكەن قىزىلوردا وبلىسى قارماقشى اۋدانىنا قاراستى №250 مەكتەپتىڭ اعىلشىن ءتىلى ءپانىنىڭ مۇعالىمدەرى. شەت ءتىلىن مەڭگەرگەن ماماندار قىزىل تەڭىز جاعاسىندا تىنىعۋ ءۇشىن مەكتەپ اكىمشىلىگىن ەسكەرتىپ، اقىسىز دەمالىس الۋدى ۇيعارىپتى. الايدا كەيىن ۇستازداردىڭ تۇركياداعى ترانسۆەستيتتەر كلۋبىندا دەمالعان ۆيدەولارى الەۋمەتتىك جەلىلەردە تاراپ كەتىپ، اتا - انالاردىڭ نارازىلىعىن تۋدىرعان. قاراماعىنداعى قىزمەتكەرلەردىڭ مۇنداي ارەكەتكە بارعاندىعى مەكتەپ باسشىلىعىن دا ەسەڭگىرەتىپ تاستاعان كورىنەدى.
"ەكەۋى دە اعىلشىن ءتىلى ءپانىنىڭ مۇعالىمدەرى، جاس ماماندار. بىرەۋىنىڭ "ماگيستر" اتاعى دا بار. ۇستازداردىڭ ارەكەتىن پەداگوگيكالىق كەڭەستە تالقىلادىق، جينالىسقا ادەيىلەپ تەك ايەل مۇعالىمدەردى قاتىستىرۋدى ءجون كوردىم. جينالىستان كەيىن ۇستازدار ءوز ەرىكتەرىمەن جۇمىستان كەتۋ تۋرالى ارىزدارىن جازدى. ول كىسىلەر تەك ۇستاز عانا ەمەس، سونىمەن قاتار ايەل كىسىلەر، بالا تاربيەلەپ وتىرعان انا. ارىپتەستەرىمىزدىڭ مۇنداي ارەكەتكە بارعاندارى وتە ۇيات بولدى"، - دەپ مالىمدەدى مەكتەپ ديرەكتورى گۇلجاحان ناربايەۆا.