قىزىلوردا تۇرعىنى الماتىدا ەسىرتكىمەن ۇستالدى

سينتەتيكالىق زاتتى كوتەرمە باعامەن الىپ، بولشەكتەپ ساتقان جىگىت ۇستالدى

الماتى پوليسياسى قىزىلوردالىقتان سينتەتيكالىق ەسىرتكىنىڭ اسا ءىرى پارتياسىن تاركىلەدى، دەپ حابارلايدى Almaty-akshamy.kz Polisia.kz-كە سىلتەمە جاساپ.

ەسىرتكى قىلمىسىنا قارسى كۇرەس ءبولىمىنىڭ جەدەل قىزمەتكەرلەرى ارنايى ءىس-شارانى الماتىنىڭ ناۋرىزباي اۋدانىندا جۇرگىزدى.

«قىزىلوردا وبلىسىنىڭ 24 جاستاعى تۇرعىنى ۇستالدى. ول، انىقتالعانداي، بەتبەلگىلەر ارقىلى سينتەتيكالىق ەسىرتكى ساتۋمەن اينالىسقان. ونىڭ تۇرعىلىقتى جەرىندە پوليەتيلەن پاكەتتەرگە ورالعان ءشوپ، سونداي-اق كۇدىكتىنىڭ وراعاندا جانە ەسىرتكىنى تاراتقاندا پايدالانعان قۇرالى تابىلىپ، تاركىلەندى. ۇستالعان ازاماتتىڭ ايتۋىنشا، ول سينتەتيكالىق زاتتاردى ينتەرنەت ارقىلى كوتەرمە ساۋدامەن ساتىپ الىپ، الماتى قالاسى مەن الماتى وبلىسىندا بولشەك ساۋدادا وتكىزگەن. كۇدىكتى ەسىرتكى زاتتارىن ساتقانى ءۇشىن ەلەكتروندى اۋدارىمدار ارقىلى سىياقى العان. ءبىر تاپسىرىستىڭ سوماسى 100 مىڭنان 200 مىڭ تەڭگەگە دەيىن بولدى. سوت-حيميالىق ساراپتاماسىنىڭ قورىتىندىسى بويىنشا، ەسىرتكى – “PVP”، ونىڭ سالماعى 130 گراممدى قۇرادى»، – دەپ حابارلادى الماتى قالالىق پد ەسىرتكى قىلمىسىنا قارسى كۇرەس باسقارماسىنىڭ باستىعى ەرلان الماعامبەتوۆ.

كۇدىكتى ۋاقىتشا ۇستاۋ يزولياتورىنا قامالدى. وعان ق ر قك-نىڭ 297-بابى 3-بولىگى (اسا ءىرى كولەمدە ەسىرتكىنى ساتۋ ماقساتىندا زاڭسىز ساقتاۋ، تاسىمالداۋ) بويىنشا ايىپ تاعىلدى.