نۇرلان نىعماتۋلين ءماجىلىس پالاتاسىنىڭ جۇمىسىن قورىتىندىلادى
پارلامەنت ءماجىلىسىنىڭ ءتوراعاسى نۇرلان نىعماتۋلين پالاتانىڭ 2021 جىلعى جۇمىسىن قورىتىندىلادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«بۇگىن ءبىز 2021 جىلدىڭ قورىتىندى جالپى وتىرىسىن وتكىزىپ وتىرمىز. سوندىقتان وسى جىلدىڭ جانە جالپى ەكىنشى سەسسيانىڭ كەيبىر ناتيجەلەرىنە توقتالماقپىن. ەرەكشە ايتۋ كەرەك، جۋىردا عانا قازاقستان تاۋەلسىزدىگىنە 30 جىل تولدى. وسى 30 جىلدىڭ ءاربىر بەلەسى - ءبىز ءۇشىن قايتالانباس تاريح. بۇل جولدا ءبىزدىڭ پارلامەنت وزىنە جۇكتەلگەن جاۋاپكەرشىلىكتى ابىرويمەن اتقارىپ، ەلىمىزدىڭ ساياسي-ەكوميكالىق، الەۋمەتتىك، مادەني دامۋىنىڭ زاڭنامالىق تىرەگى بولىپ كەلەدى. ءبىز قابىلداعان ءاربىر قۇجات، ەڭ الدىمەن، ەلىمىزدىڭ ەكونوميكاسىن ارتتىرۋعا، حالىقتىڭ الەۋمەتتىك جاعدايىن، سونىڭ ىشىندە ونەركاسىپ، دەنساۋلىق، ءبىلىم سالالارىن جاقسارتۋعا ارنالىپ كەلەدى»، - دەدى ن. نىعماتۋلين پالاتانىڭ جالپى وتىرىسىندا.
سونىمەن بىرگە ول بيىل شاعىن جانە ورتا بيزنەس، ەكولوگيا ماسەلەلەرىنە دە ەرەكشە نازار اۋدارىلعانىن اتاپ ءوتتى.
«وسىنىڭ بارلىعى تۇڭعىش پرەزيدەنت-ەلباسى نۇرسۇلتان نازاربايەۆتىڭ ستراتەگيالىق تاپسىرمالارىن جانە مەملەكەت باسشىسى قاسىم-جومارت توقايەۆتىڭ باستامالارىن ساپالى زاڭدارمەن قامتاماسىز ەتۋگە باعىتتالىپ وتىر. الدىمىزدا ءالى دە كوپتەگەن ماڭىزدى مىندەتتەر تۇر. ءبىز كەلەسى جىلى دا قالىپتاسقان تاجىريبەنى، مۇمكىندىكتى پايدالانا وتىرىپ، ەلىمىزدەگى رەفورمالاردى جانە وزگەرىستەردى ءتيىستى زاڭدارمەن قامتاماسىز ەتەمىز دەپ سەنەمىز»، - دەدى ءماجىلىس ءتوراعاسى.
وسى ورايدا ول دەپۋتاتتارعا، ءماجىلىس اپپاراتىنىڭ قىزمەتكەرلەرىنە بىرلەسكەن جۇمىستارى ءۇشىن العىس ايتتى. 2022 جىلى اۋقىمدى جۇمىس كۇتىپ تۇرعانىنا توقتالعان ن. نىعماتۋلين بارشا فراكسيانىڭ، دەپۋتاتاردىڭ بىرلەسكەن جۇمىسىنىڭ ارقاسىندا ءماجىلىس ساپالى ءارى ءتيىمدى زاڭنامالىق قولداۋدى قامتاماسىز ەتەتىنىنە سەنىمدى ەكەنىن ايتتى.
بۇدان بۇرىن حابارلانعانداي، بۇگىن ءماجىلىستىڭ جالپى وتىرىسىندا دەپۋتات بەكبولات تىلەۋحاننىڭ وكىلەتتىگى مەرزىمىنەن بۇرىن توقتاتىلدى.