قىزىلوردا وبلىسىندا ەكى اۋىلدىق وكرۋگتە اكىم سايلاۋى ءوتىپ جاتىر، دەپ حابارلايدى almaty-akshamy.kz قازاقپاراتقا سىلتەمە جاساپ.
بۇگىن قىزىلوردا وبلىسىنىڭ جاڭاقورعان اۋدانىنا قاراستى ءسۇتتىقۇدىق جانە قاراتوبە اۋىلدىق وكرۋگتەرىندە اكىم سايلاۋى بولىپ جاتىر. جەرگىلىكتى تۇرعىندار تاڭەرتەڭ ساعات 7.00-دەن باستاپ №309، №322 سايلاۋ ۋچاسكەلەرىنە كەلىپ، تاڭداۋ جاساي باستادى. العاشقى كەلگەن سايلاۋشىلارعا سىيلىقتار بەرىلدى.
«ءسۇتتىقۇدىق اۋىلدىق وكرۋگىندەگى 1 185 سايلاۋشى ءوزىن-وزى ۇسىنۋ تارتىبىمەن قاتىسىپ جاتقان 2 ازاماتقا داۋىس بەرىپ جاتىر. ال، قاراتوبە اۋىلدىق وكرۋگىندە ءوزىن-وزى ۇسىنۋ جولىمەن كانديدات بولعان 3 كانديداتقا 970 سايلاۋشى داۋىس بەرەدى. اكىم سايلاۋىنا قاتىسىپ جاتقان جەرگىلىكتى تۇرعىنداردىڭ بەلسەندىلىگى جوعارى»، - دەدى وبلىستىق سايلاۋ كوميسسياسىنان.
ەسكە سالساق، جىل باسىنان بەرى قىزىلوردا وڭىرىندە 10 اۋىلدىڭ اكىمى سايلاندى. ولاردىڭ قاتارىندا ارال اۋدانىنىڭ جاڭاقۇرىلىس جانە قۇلاندى، قازالى اۋدانىنىڭ اقجونا، ارىقبالىق، جالاعاش اۋدانىنىڭ جاڭاداريا، اققۇم، مىرزاباي احۋن، سىرداريا اۋدانىنىڭ اقجارما، جاڭاقورعان اۋدانىنىڭ جاڭارىق جانە قارماقشى اۋدانىنىڭ اقتوبە اۋىلدىق وكرۋگى اكىمىنىڭ سايلاۋى بار.
بيىل پرەزيدەنت تاپسىرماسىنا سايكەس اۋدان اكىمدەرىنىڭ سايلاۋى وتەدى. قىزىلوردا وڭىرىندە تۇرعىندار 2 اۋداننىڭ اكىمىن تىكەلەي سايلايدى.
