قىزىلوردا وبلىسىندا كيىك اتقاندار ۇستالدى

بۇل تۋرالى قىزىلوردا وبلىستىق تابيعي رەسۋرستار باسقارماسى حابارلادى.

قىزىلوردا وبلىسىنىڭ تابيعي رەسۋرستار جانە تابيعات پايدالانۋدى رەتتەۋ باسقارماسىنا قاراستى «قىزىلوردا وبلىستىق جانۋارلار دۇنيەسىن مەملەكەتتىك قورعاۋ جونىندەگى مامانداندىرىلعان مەكەمەسىنىڭ» ماماندارى «وحوتزووپروم ءوب» رمكق قىزمەتكەرلەرىمەن بىرلەسىپ رەيد جۇرگىزدى، دەپ حابارلايدى Almaty-akshamy.kz

كەزەكتى ءىس-شارا بارىسىندا تابيعات ساقشىلارى جالاعاش اۋدانىنا قاراستى جىرىق اتتى سكۆاجيناسى ماڭىندا «تايوتا لاند كرۋزەر – 100» اۆتوكولىگى كۇدىك تۋدىرىپ، قىراعى ماماندار كوزىنە ىلىككەن. الايدا ءىزىن سۋىتپاق بولعان بەلگىسىز تۇلعانىڭ جالاعاش اۋدانىنا قاراستى قىزىلشىن دەپ اتالاتىن جەردە كولىگى ورتەنگەندىگى بايقالدى. سول جەردەن بارلىعى 17 باس اقبوكەن جانۋارىنىڭ ءولى دەنەسى جانە 54 دانا ءمۇيىزى تابىلىپ ايعاق زات رەتىندە الىنعان. 

بىرلەسكەن ءىس-قيمىلداردىڭ ناتيجەسىندە جالاعاش اۋداندىق پوليسيا بولىمىمەن بىرلەسىپ، سول ماڭدى قاراۋ بارىسىندا شاقشاق دەپ اتالاتىن مال اۋىلىنان كۇدىك كەلتىرىلگەن قىزىلوردا قالاسىنىڭ تۇرعىنى انىقتالدى. قازىرگى تاڭدا ورىن العان وقيعا بويىنشا ءمان-جايدى قاراپ، شارا قولدانۋ ءۇشىن قۇجاتتار مەن ايعاق زاتتار جالاعاش اۋداندىق پوليسيا بولىمىنە وتكىزىلدى، - دەلىنگەن حابارلامادا.