بيىل قازاقستان رەسپۋبليكاسى سۋ رەسۋرستارى جانە يرريگاسيا مينيسترلىگى قىزىلاعاش سۋ قويماسىن قايتا جاڭعىرتۋ جۇمىستارىن ءساتتى اياقتادى.
جوبانىڭ اياسىندا سۋ تاسقىنى كەزىندە ارتىق سۋدى جىبەرۋگە ارنالعان ارنا نىعايتىلىپ، جاڭا سۋ قابىلداۋ توراپتارى سالىندى،- دەپ حابارلايدى Aqshamnews.kz
جاڭعىرتۋ ناتيجەسىندە نىسانعا زاماناۋي باقىلاۋ داچيكتەرى، اۆتوماتتاندىرىلعان مونيتورينگ جۇيەسى جانە جەرگىلىكتى حابارلاندىرۋ جۇيەسى ورناتىلدى. سىيىمدىلىعى 42،6 ميلليون تەكشە مەتر بولاتىن قويما ەندى 6 680 گەكتار ەگىستىك القابىن تۇراقتى تۇردە سۋمەن قامتاماسىز ەتە الادى.
سالا ماماندارىنىڭ ايتۋىنشا، بۇل جوبا وڭىردەگى اۋىل شارۋاشىلىعىنىڭ دامۋىنا وڭ ىقپال ەتىپ قانا قويماي، توتەنشە جاعدايلاردىڭ الدىن الۋعا دا سەپتىگىن تيگىزەدى.
«مەملەكەت باسشىسى ەلىمىزدىڭ سۋ شارۋاشىلىعى ينفراقۇرىلىمىن جاڭعىرتۋدى تاپسىرعان بولاتىن. وسى باعىتتا 2023 جىلى گيدروتەحنيكالىق نىسانداردى تۇگەندەۋ جۇرگىزىلىپ، ناتيجەسىندە سۋ سالاسىن دامىتۋدىڭ كەشەندى جوسپارى ازىرلەندى. بۇل جوسپار 160-تان استام ءىس-شارانى قامتيدى، ونىڭ ىشىندە 42 جاڭا سۋ قويماسىن سالۋ جانە 37 قولدانىستاعى نىساندى رەكونسترۋكسيالاۋ قاراستىرىلعان. قىزىلاعاش سۋ قويماسىن جاڭعىرتۋ — وسى كەشەندى جۇمىستىڭ ماڭىزدى بولىگى. بۇل جوبا جەتىسۋ وبلىسىنىڭ اۋىل شارۋاشىلىعىنا سەرپىن بەرىپ، تۇرعىنداردى سۋ تاسقىنى قاتەرىنەن قورعاۋعا مۇمكىندىك بەرەدى»، — دەدى سۋ رەسۋرستارى جانە يرريگاسيا ۆيسە-مينيسترى ەربولات يبرايحانوۆ.
قايتا جاڭعىرتۋ جۇمىستارى — ەلىمىزدەگى سۋ رەسۋرستارىن ءتيىمدى پايدالانۋ مەن اۋىل شارۋاشىلىعىن تۇراقتى دامىتۋ جولىنداعى ماڭىزدى قادامداردىڭ ءبىرى. الداعى ۋاقىتتا مينيسترلىك سۋ ينفراقۇرىلىمىن جاڭارتۋ جۇمىستارىن جالعاستىرۋدى جوسپارلاپ وتىر.