قازاقستان رەسپۋبليكاسى وقۋ-اعارتۋ مينيسترلىگىنىڭ ءبىلىم سالاسىندا ساپانى قامتاماسىز ەتۋ كوميتەتى 2025 جىلى مەملەكەتتىك اتتەستاسيادان وتەتىن 3025 ءبىلىم بەرۋ ۇيىمىن ايقىندادى.
بيىلعى جىلدىڭ ءبىرىنشى جارتىجىلدىعىندا ءبىلىم بەرۋ سالاسىنداعى ساپانى قامتاماسىز ەتۋ جونىندەگى اۋماقتىق دەپارتامەنتتەر 1170 ءبىلىم بەرۋ ۇيىمىندا مەملەكەتتىك اتتەستاسيا جۇرگىزدى، - دەپ حابارلايدى Aqshamnews.kz.
ءىس-شارالار ءبىلىم بەرۋ پروسەسىندەگى پروبلەمالاردى انىقتاۋعا، ءبىلىم بەرۋ پروسەسىنىڭ مەملەكەتتىك جالپىعا مىندەتتى ءبىلىم بەرۋ ستاندارتىنىڭ جانە بىلىكتىلىك تالاپتارىنا سايكەستىگىن ايقىنداۋعا باعىتتالعان.
«وتكەن جىلى كوميتەت پەن ونىڭ اۋماقتىق دەپارتامەنتتەرى 2487 ءبىلىم بەرۋ ۇيىمىندا ءتۇرلى تەكسەرۋلەر جۇرگىزدى، ونىڭ ىشىندە مەملەكەتتىك اتتەستاتتاۋ، پروفيلاكتيكالىق باقىلاۋ، شاعىمدار بويىنشا جوسپاردان تىس تەكسەرۋلەر جۇرگىزىلدى. تەكسەرۋ ناتيجەسىندە مۇعالىمدەردىڭ بىلىكتىلىگىن ارتتىرۋ كۋرستارىنىڭ ۋاقتىلى اياقتالماۋى، مەكتەپتەردىڭ ماتەريالدىق-تەحنيكالىق بازاسىنىڭ تالاپقا ساي قامتاماسىز ەتىلمەۋى فاكتىلەرى انىقتالدى»، - دەپ اتاپ ءوتتى ءبىلىم سالاسىندا ساپانى قامتاماسىز ەتۋ كوميتەتىنىڭ ءتوراعاسى سەرىك ءاشىروۆ.
ايتا كەتۋ كەرەك، باقىلاۋ ءىس-شارالارىن جۇرگىزۋ ءبىلىم بەرۋ سالاسىندا كورسەتىلەتىن قىزمەتتەردىڭ ساپاسىن، ونىڭ ىشىندە پەداگوگتەردىڭ قۇقىقتارىن قورعاۋدى قامتاماسىز ەتەدى.