«قىزىل» بولساڭ، قۇربان شالا المايسىڭ

وعان قوسا، «سارى» مارتەبەسى بار ازاماتتار دا قۇرباندىق شالۋ ورىندارىنا كىرگىزىلمەيدى.

بيىل قۇرباندىق شالاتىن ارنايى ورىنداردا ASHYQ ءموبيلدى قوسىمشاسى ىسكە قوسىلادى، دەپ حابارلايدى Almaty-akshamy.kz.

بۇل تۋرالى حابارلاعان قمدب ءتوراعاسىنىڭ ورىنباسارى، نايب ءمۇفتي ەرشات وڭعاردىڭ ايتۋىنشا، ەڭ باستى تالاپ – مالدىڭ  شاريعات تالاپتارىنا سايكەس باۋىزداپ، سويىلۋىن قاتاڭ قاداعالاۋ.

«سارى» جانە «جاسىل» ايماقتاعى قۇرباندىق شالاتىن ارنايى ورىنداردا ازاماتتاردىڭ دەنساۋلىعىنا ەرەكشە كوڭىل ءبولۋ جانە قوعامدىق قاۋىپسىزدىكتى قامتاماسىز ەتۋ ماقساتىندا اshyq ءموبيلدى قوسىمشاسى ىسكە قوسىلادى. اتاپ ايتقاندا، «قىزىل» جانە «سارى» مارتەبەسى بار ازاماتتار قۇرباندىق شالۋ ورىندارىنا جىبەرىلمەيدى، «كوك»، «جاسىل» مارتەبەسى بار ازاماتتار عانا جىبەرىلەدى»، - دەدى ەرشات وڭعار.

وسى رەتتە، نۇر-سۇلتان، الماتى جانە شىمكەنت قالالارى، وبلىستاردىڭ اكىمدىكتەرى ىشكى ىستەر، دەنساۋلىق ساقتاۋ مينيسترلىكتەرى، قمدب-مەن بىرلەسىپ، ەلىمىزدىڭ وڭىرلەرىندە اshyq ءموبيلدى قوسىمشاسى اياسىندا قوعامدىق قاۋىپسىزدىكتى قامتاماسىز ەتەدى.

«قاساپحاناعا ماسكا تاعىپ، اراقاشىقتىق ساقتاپ، دەنە قىزۋى بار ادامداردىڭ جاقىنداۋىنا جول بەرمەۋگە ءتيىسپىز. جاسى 65-تەن اسقان قاريالار، ايەلدەر مەن بالالاردىڭ بارىنشا قۇربان مالىن شالاتىن ورىندارعا بارۋىن شەكتەۋگە شاقىرامىز. قازىرگى ۋاقىتتا قاساپحاناعا قويىلاتىن ءتارتىپ جوعارى. ونى ۇدايى باقىلاپ، كەلۋشىلەرمەن اراداعى بايلانىسقا ءجىتى ءمان بەرۋىمىز كەرەك. ەڭ باستىسى، مالدىڭ شاريعات تالاپتارىنا سايكەس باۋىزداپ، سويىلۋىن قاتاڭ قاداعالاۋ قاجەت»، - دەدى ەرشات وڭعار.

ايتا كەتەيىك، 2021 جىلى قۇربان شالۋ ءراسىمى ەكى جولمەن جۇزەگە اسىرىلادى. «سارى» جانە «جاسىل» ايماقتاردا ونلاين جانە وفلاين فورماتتا وتسە، «قىزىل» ايماقتاردا پاندەميا جاعدايىندا شاريعاتتاعى «وكىلدىك» قاعيداسىنا سايكەس، qurban2021.kz سايتى ارقىلى تەك ونلاين رەجيمدە قۇربان شالىنادى.