بۇگىن ىسكە قوسىلعان سايت جۇمىسى قۇربان ايتتىڭ ءۇشىنشى كۇنى، ياعني 22 شىلدەگە دەيىن جالعاسادى.
قمدب ءتوراعاسى ناۋرىزباي قاجى تاعان ۇلى ورتالىق كوممۋنيكاسيالار قىزمەتىندە وتكەن بريفينگتە بيىل قۇربان شالۋ ءراسىمىن قاشىقتان وتكىزۋگە ارنالعان qurban2021.kz سايتى ىسكە قوسىلعانىن ايتتى، دەپ حابارلايدى Almaty-akshamy.kz
باس ءمۇفتي qurban2021.kz جوباسىنىڭ ماقساتى قايىرىمدىلىققا دانەكەر بولۋ، حالىقتىڭ دەنساۋلىعى مەن ومىرىنە تونگەن ءقاۋىپتى سەيىلتۋگە ۇلەس قوسۋ، قۇربان شالۋعا نيەت بىلدىرگەن جاندارعا كارانتين جاعدايىندا وڭتايلى جول ۇسىنۋ ەكەنىن اتاپ ءوتتى.
«قمدب-نىڭ qurban2021.kz سايتى بۇگىن ساعات 15:00-دە ىسكە قوسىلىپ، قۇربان ايتتىڭ ءۇشىنشى كۇنى، ياعني 22 شىلدەگە دەيىن جۇمىس ىستەيدى. قۇربان شالۋعا نيەت ەتكەن ازاماتتار وسى ارالىقتا تاپسىرىس بەرە الادى. سونداي-اق 17 شىلدەدەن باستاپ وسى سايت ارقىلى مۇقتاج وتباسىلاردىڭ قۇرباندىق ەتىن الۋ ءۇشىن ءوتىنىش بەرۋىنە بولادى. مۇقتاج وتباسىلاردىڭ وتىنىشتەرىن قابىلداۋ، ساراپتاۋ جانە قۇرباندىق ەتتەرىن جەتكىزىپ بەرۋ جۇمىستارىمەن قمدب-نىڭ جەرگىلىكتى وكىلدىكتەرى جانە ەرىكتىلەر اينالىسادى»، - دەدى ناۋرىزباي قاجى تاعان ۇلى.
بريفينگتە باس ءمۇفتي اۋىلدىق جەردە جەكە تۇرعىن ۇيدە تۇراتىن ءار ادامنىڭ قۇربان شالۋىنا قمدب تاراپىنان ەشقانداي شەكتەۋ بولمايتىنىن جەتكىزدى.