2025 جىلدىڭ 29–30 قىركۇيەگىندە QyzPU دەلەگاسياسى يندونەزيانىڭ بوگور قالاسىندا وتكەن Asia Hub Annual Meeting 2025 حالىقارالىق سامميتىنە قاتىستى.
اۋقىمدى شارا IPB University بازاسىندا ۇيىمداستىرىلىپ، وسى جىلدىڭ باستى تاقىرىبى «تدم 4 جانە ساپالى ءبىلىم بەرۋ سالاسىنداعى جاھاندىق ارىپتەستىك» بولدى، - دەپ حابارلايدى Aqshamnews.kz.
ۋنيۆەرسيتەت اتىنان حالىقارالىق ىنتىماقتاستىق ءبولىمىنىڭ باسشىسى، PhD دوكتور سالتانات جاكۋبايەۆا جانە پەداگوگيكا جانە پسيحولوگيا ينستيتۋتىنىڭ مەكتەپكە دەيىنگى ءبىلىم بەرۋ كافەدراسىنىڭ باعدارلاما كوشباسشىسى، پەداگوگيكا عىلىمدارىنىڭ كانديداتى، پروفەسسور م.ا. اقگۇل جۇباندىكوۆا قاتىستى.
سامميت ءبىلىم بەرۋ سالاسىنداعى ايماقتىق جانە جاھاندىق ساراپشىلاردى، عىلىمي-زەرتتەۋ ۇيىمدارىن جانە ۋنيۆەرسيتەت وكىلدەرىن بىرىكتىردى. قاتىسۋشىلار بۇۇ-نىڭ تۇراقتى دامۋ ماقساتى 4 (SDG 4) شەڭبەرىندە ينكليۋزيۆتى جانە ساپالى ءبىلىم بەرۋدى قامتاماسىز ەتۋ جولدارىن تالقىلادى.
ءىس-شارانى ميچيگان مەملەكەتتىك ۋنيۆەرسيتەتىنىڭ (Michigan State University) ءبىلىم بەرۋ كوللەدجى ۇيىمداستىردى. سەرىكتەستەر قاتارىندا UNICEF Indonesia، SEAMEO STEM ءبىلىم بەرۋ ورتالىعى جانە Universitas Padjadjaran ۋنيۆەرسيتەتىنىڭ تۇراقتى دامۋ ماقساتتارى ورتالىعى بار.
ەكى كۇنگە سوزىلعان سامميت بارىسىندا قاتىسۋشىلار ايماقتىق ءبىلىم ساياساتىنىڭ باسىم باعىتتارىن سارالاپ، ۇزدىك تاجىريبەلەرمەن ءبولىستى. سونىمەن قاتار ازياداعى ءبىلىم بەرۋدى ترانسفورماسيالاۋ جانە تۇراقتى ىنتىماقتاستىق قاۋىمداستىعىن قۇرۋ ماسەلەلەرى كوتەرىلدى.
قازاقستان اتىنان ءسوز سويلەگەن سالتانات جاكۋبايەۆا جوعارى ءبىلىمنىڭ ينتەرناسيونالدانۋى، سيفرلىق ترانسفورماسيا جانە ايەلدەردىڭ اكادەميالىق كوشباسشىلىعى تاقىرىپتارىندا تاجىريبە ءبولىستى.
«بۇل سامميت – تاجىريبە الماسۋعا، جاڭا سەرىكتەستىك باعىتتارىن بەلگىلەۋگە ارنالعان ماڭىزدى پلاتفورما. سيفرلىق ءبىلىم بەرۋ مەن ينكليۋزيا باعىتتارىندا جەتەكشى ۋنيۆەرسيتەتتەرمەن بايلانىس ورناتۋ – ءبىز ءۇشىن ۇلكەن مۇمكىندىك»، – دەدى سالتانات جاكۋبايەۆا.
بۇل شاراعا قاتىسۋ ۋنيۆەرسيتەتتىڭ حالىقارالىق ىقپالداستىقتى ارتتىرۋعا، يننوۆاسيالىق ءبىلىم بەرۋ تاجىريبەسىن دامىتۋعا جانە بۇۇ تۇراقتى دامۋ ماقساتتارىنا قول جەتكىزۋگە بەلسەندى اتسالىسۋعا دەگەن ۇمتىلىسىن كورسەتەدى.