بۇگىن قازاق ۇلتتىق قىزدار پەداگوگيكالىق ۋنيۆەرسيتەتىندە بەلگىلى قوعام قايراتكەرى، ءتىل جاناشىرى، QyzPU تۇلەگى ورازكۇل اسانعازىقىزىنىڭ «وتباسى بەرەكەسى» اتتى جاڭا كىتابىنىڭ تانىستىرىلىمى ءوتتى، دەپ حابارلايدى aqshamnews.kz.
ايتۋلى شاراعا ۋنيۆەرسيتەتتىڭ رەكتورى گۇلميرا قاناي، پروفەسسورلىق-وقىتۋشىلىق قۇرام مەن ستۋدەنتتەر، قوعام قايراتكەرلەرى، ورازكۇل اسانعازىنىڭ تۋىستارى، دوستارى جانە زامانداستارى قاتىستى.
كىتاپتىڭ تۇساۋكەسەر راسىمىنە رەكتورى گۇلميرا قاناي، جازۋشى، پەداگوگيكا عىلىمدارىنىڭ دوكتورى سوۆەت-حان عابباسوۆ، قازاقستاننىڭ ەڭبەك سىڭىرگەن قايراتكەرى، قازاقتىڭ اياۋلى اقىن قىزى اقۇشتاپ باقتىگەرەيەۆا، زاڭ عىلىمدارىنىڭ دوكتورى جالايري ءومىرالى شاكاراپ ۇلى، تاريح عىلىمدارىنىڭ دوكتورى، پروفەسسور قويگەلدى مامبەت قۇلجاباي ۇلى قاتىسىپ، كىتاپتىڭ قىزىل لەنتاسىن قيدى.
اسانعازى ورازكۇل اسانعازىقىزى – قوعامدا ءوز ورنى بار، ۇلتتىڭ ءتىلى، ءداستۇرى جانە مادەنيەتىن ساقتاۋ جولىندا بەلسەندى قىزمەت ەتىپ كەلە جاتقان كورنەكتى تۇلعا. بۇل كىتاپ جاستارعا ۇلتتىق قۇندىلىقتاردى ناسيحاتتاۋ، وتباسى بەرەكەسىن ساقتاۋ جانە ۇرپاق تاربيەسىنە ۇلكەن جاۋاپكەرشىلىكپەن قاراۋ قاجەتتىلىگىن ءتۇسىندىرۋ ماقساتىندا جازىلعان.
«مەن العاشىندا «وتباسى بەرەكەسى» تاقىرىبىندا ءدارىس وقىپ ءجۇردىم. كەيىن وسى دارىستەرىمدى جيناقتاپ، كىتاپ ەتىپ شىعاردىم. كىتاپ ءۇش تاراۋدان تۇرادى: «وتان وتباسىنان باستالادى»، «وتباسى بەرەكەسى ماحابباتتا»، «ەل بۇگىنشىل، مەنىكى ەرتەڭ ءۇشىن...». ياعني، دارىستەرىمدە قولدانعان اڭگىمەلەرىمدى ءوز ومىرلىك تاجىريبەممەن ساباقتاستىرىپ جازدىم. كىتاپتىڭ ەڭ باستى ەرەكشەلىگى – ونىڭ ومىرشەڭدىگى. ول وتباسى قۇرۋدى جوسپارلاعان جاستارعا دا، ءومىردىڭ تالاي بەلەسىن ارتقا تاستاعان قاريالارعا دا ارنالعان»،-دەدى ورازكۇل اسانعازى قىزى.
«وتباسى بەرەكەسى» كىتابى – ۇلتتىق تاربيە مەن وتباسىلىق قۇندىلىقتاردى دارىپتەيتىن ماڭىزدى ەڭبەك. كىتاپتا قازاق وتباسىنداعى تاربيەنىڭ ماڭىزى، اتا-انا ءرولى، ۇرپاقتار ساباقتاستىعى جانە وتباسىنداعى بەرەكەنىڭ ساقتالۋى تۋرالى ويلار مەن ۇسىنىستار قاراستىرىلعان.
«كىتاپتى وقىپ شىقتىم. بولاشاق جاستار ءۇشىن ناعىز باعدارشام دەسەم، ارتىق ايتقانىم ەمەس. كىتاپتى وقي وتىرىپ، اۆتورىمەن سۇقباتتاسىپ وتىرعانداي اسەر الدىم. كەيبىر ومىرلىك سۇراقتارىما وسى تۋىندى ارقىلى جاۋاپ تاپتىم. قازاقتىڭ تەكتىلىك ماسەلەسى تەرەڭىنەن تالقىلانعان قۇندى ەڭبەك. بارشاڭىزعا وقۋعا كەڭەس بەرەمىن!»،-دەدى قازاق ۇلتتىق قىزدار پەداگوگيكالىق ۋنيۆەرسيتەتىنىڭ قاۋىمداستىرىلعان پروفەسسورى ايسۇلۋ كەنجان مولىنباي قىزى.
كەش بارىسىندا كىتاپتان ۇزىندىلەر وقىلىپ، اۆتوردىڭ ويلارى مەن تۋىندىسىنىڭ نەگىزگى يدەيالارى تالقىلاندى. سونىمەن قاتار قاتىسۋشىلار كىتاپتىڭ وزەكتىلىگى مەن وتباسى تاربيەسىنىڭ قازىرگى قوعامداعى ورنى تۋرالى پىكىر الماسىپ، رۋحاني جاڭعىرۋدى قامتاماسىز ەتۋ جولدارى جايلى ءسوز قوزعادى.
ورازكۇل اسانعازىقىزىنىڭ «وتباسى بەرەكەسى» كىتابى – وتباسى قۇندىلىقتارىن ناسيحاتتايتىن قۇندى تۋىندى. بۇل كىتاپ تەك جاستارعا عانا ەمەس، وتباسىلىق ءومىردىڭ ءمانىن تەرەڭىنەن ۇعىنعىسى كەلەتىن ءاربىر جانعا ارنالعان.