جۇكتىلىك جانە بوسانۋعا قاتىستى اسىرا تولەم العان 113 ادامعا قاتىستى قىلمىستىق ءىس قوزعالدى. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگىنىڭ كەڭەيتىلگەن القا ماجىلىسىندە ۆەدومستۆو باسشىسى سۆەتلانا جاقىپوۆا ايتتى، دەپ حابارلايدى aqshamnews.kz
— 2024 جىلى مەملەكەتتىك الەۋمەتتىك ساقتاندىرۋ قورىنان 958 ملرد تەڭگە سوماسىنا 1،4 ملن ازاماتقا تولەمدەر جۇرگىزىلدى. 15 وڭىردە جۇيەگە قاتىسۋشىلارعا تولەنەتىن تولەمدەر كولەمى مەملەكەتتىك الەۋمەتتىك ساقتاندىرۋ قورىنان جۇمىس ىستەيتىن ازاماتتار ءۇشىن الەۋمەتتىك اۋدارىمدار تۇسىمىنەن اسىپ ءتۇستى. تەك ءبىر عانا الەۋمەتتىك تولەمنىڭ ماكسيمالدى مولشەرىنە شەكتەۋلەر جوق — بۇل جۇكتىلىك جانە بوسانۋعا قاتىستى تولەمدەر. سوندىقتان جەكەلەگەن ازاماتتار جاساندى تۇردە ۇلعايتىلعان تولەم مولشەرىن الۋ ءۇشىن زاڭناماداعى ولقىلىقتاردى ىزدەستىرۋدە. بۇل وسى جۇيەگە ادال قاتىسۋشىلاردىڭ الەۋمەتتىك اۋدارىمدارىن قايتا بولۋدە ادىلەتسىزدىككە اكەپ سوعادى، — دەدى مينيستر.
ونىڭ دەرەگىنشە، قازىرگى ۋاقىتتا 113 الۋشىعا قاتىستى 16 قىلمىستىق ءىس قوزعالدى. ولاردىڭ كەلتىرگەن زالال سوماسى 158،4 ملن تەڭگەنى قۇرادى. 2024 جىلدىڭ قىركۇيەگىنەن باستاپ 1،5 مىڭعا جۋىق الۋشى ءوز ەركىمەن تابىسىنىڭ جاساندى وسىرىلگەنىن راستادى. وسىلايشا مەملەكەتتىك الەۋمەتتىك ساقتاندىرۋ قورى اكتيۆتەرى 3،4 ملرد تەڭگە سوماسىندا ساقتالدى.
— مينيسترلىك زاڭنامالىق باستامالار توپتاماسىن ازىرلەدى. ولاردى ىسكە اسىرۋ الداعى 10 جىلعا مىندەتتى الەۋمەتتىك ساقتاندىرۋ جۇيەسىنىڭ قارجىلىق تۇراقتىلىعىنىڭ كوكجيەگىن كەڭەيتۋگە مۇمكىندىك بەرەدى، — دەدى سۆەتلانا جاقىپوۆا.