جالپى، كەزەكتە 20 مىڭنان استام كولىك تىركەلگەن
الماتى قالاسىنىڭ كاسىپكەرلەر پالاتاسىنىڭ الاڭىندا جۇك تاسىمالداۋ سالاسىنىڭ وكىلدەرى قحر شەكاراسىندا اۆتوكولىكتەردى وتكىزۋ ماسەلەلەرىن تالقىلادى، دەپ حابارلايدى Almaty-akshamy.kz.
كەزدەسۋ بارىسىندا «اتامەكەن» ۇكپ باسقارما ءتوراعاسىنىڭ ورىنباسارى تيمۋر جاركەنوۆ ۇلتتىق پالاتا وكىلدەرى شەكاراداعى جاعدايدى رەتتەۋ جونىندەگى ۆەدومستۆوارالىق جۇمىس توبىنىڭ قۇرامىنا كىرگەنىن ەسكە سالدى. توپ ق ر پرەمەر-مينيسترىنىڭ تاپسىرماسى شەڭبەرىندە 2023 جىلعى 13 ناۋرىزدا قۇرىلدى. سپيكەر جۇمىس توبى ماسەلەنى شەشۋدە قانداي شارالاردى قولعا العانىن اتاپ ءوتتى.
«جالپى، كەزەكتە 20 مىڭنان استام كولىك تىركەلگەن. بۇل ناقتى ەمەس كولىك قۇرالدارى، ناقتى ەمەس تاسىمالداۋشىلار ەكەنى تۇسىنىكتى. فاكتى بويىنشا 12 مىڭعا جۋىق اۆتوموبيل بار. جالپى، بۇل كەزەك ەكى اي ىشىندە تولىعىمەن رەتتەلۋى كەرەك دەگەن شەشىم قابىلداندى. ارينە، ەگەر قازىرگىدەي 100 ماشينا عانا بولسا، كەپتەلىس شەكسىز جالعاسا بەرەدى. بۇل مۇمكىن ەمەس. كەزەكتە تۇرعان كولىكتەردىڭ شامامەن جارتىسى، ايىنا 6 مىڭ اۆتوموبيلدەن بولىنەدى، ياعني بۇل كولىكتەردىڭ ءبىرىنشى جارتىسىنا ءبىرىنشى ايدا شىعۋعا مۇمكىندىك بەرىلەدى. ەكىنشى 6 مىڭ كولىك وسى كۇندەردىڭ كەز كەلگەنىندە ەكىنشى ايدا شىعا الادى. نەگە كەز كەلگەن كۇنى شىعا الادى؟ قازاقستاننىڭ تۇكپىر-تۇكپىرىنەن ءبىر ۋاقىتتا 6 مىڭ اۆتوموبيل كەلمەيتىنىن ءبارىمىز تۇسىنەمىز. كوبى ساپاردا، جوندەۋدە جانە ت. ب.»، – دەدى «اتامەكەن» ۇكپ باسقارما ءتوراعاسىنىڭ ورىنباسارى تيمۋر جاركەنوۆ.
الماتى قالاسى كاسىپكەرلەر پالاتاسىنىڭ ءتوراعاسى اۋەز تايمبەتوۆ قازاقستان، ونىڭ ىشىندە الماتىلىق كاسىپكەرلەر ءۇشىن ەكسپورت اسا ماڭىزدى ەكەنىن اتاپ ءوتتى. تيمۋر جاركەنوۆ ماسەلەنىڭ وزەكتىلىگىن راستاپ، قازىرگى ۋاقىتتا شەكارادا ەكسپورتقا باسىمدىق بەرۋ بويىنشا شەشىم قابىلدانعانىن ايتتى.
«وكىنىشكە قاراي، قازاقستاندا ەكسپورت كولەمى ۇلكەن ەمەس. كەپتەلىس كەزىندە ونىڭ كوپ مولشەرى جينالدى. ەكسپورتتى قىتايعا بارىنشا شىعارۋ تۋرالى شەشىم قابىلداندى. جالپى شەشىم ۇكپ ەكسپورت بويىنشا وپەراتور بولىپ بەلگىلەندى. ءبىز بۇل جۇمىستى ودان ءارى جۇرگىزۋ ءۇشىن ىڭعايلى، قيسىندى مەحانيزمدى ازىرلەۋىمىز كەرەك»، – دەپ اتاپ ءوتتى سپيكەر.
شەكاراداعى باسقا ماسەلەلەردى جۇك تاسىمالداۋشىلار كوتەردى. قازاقستان كەدەن بروكەرلەرى قاۋىمداستىعى كەڭەسىنىڭ ءتوراعاسى گەنناديي شەستاكوۆتىڭ ايتۋىنشا، اۆتوكولىك كەزەگىنىڭ بازاسى مەزگىل-مەزگىل ىستەن شىعادى، سالدارىنان تاسىمالداۋشىلار ايىپپۇل تولەۋگە ءماجبۇر.