ەكى ەلدىڭ ازاماتتارىنا قاتىستى اقپارات الماسۋ جۇزەگە اسىرىلادى
ىشكى ىستەر ءمينيسترى ەرجان سادەنوۆ ءماجىلىستىڭ جالپى وتىرىسىندا قوس ازاماتتىق جايلى ايتتى، دەپ حابارلادى Almaty-akshamy.kz Azattyq Ruhy-نا سىلتەمە جاساپ.
«ازاماتتاردىڭ قوس ازاماتتىعى تۋرالى اقپاراتتى تەك ولاردىڭ كەلىسىمى بويىنشا عانا بەرەمىز. كوبىنە ازاماتتار مۇندايعا كەلىسىم بەرمەيدى. بۇگىنگى كەلىسىمنىڭ راتيفيكاسياسى وسى دەرەكتەردى جەدەل الۋعا مۇمكىندىك بەرەدى. قوس ازاماتتىقتى انىقتاۋ تۋرالى سۇراققا توقتاساق، بۇل كۇندەلىكتى جۇمىس. بيىل 462 ادام قوس ازاماتتىعى ءۇشىن اكىمشىلىك جاۋاپكەرشىلىككە تارتىلدى. ءبىراق جۇڭگو بويىنشا ونداي انىقتالعان جوق»، - دەدى سادەنوۆ.
ماجىلىستە «قازاقستان رەسپۋبليكاسىنىڭ ۇكىمەتى مەن جۇڭگو حالىق رەسپۋبليكاسىنىڭ ۇكىمەتى اراسىنداعى تاراپتار مەملەكەتتەرىنىڭ ازاماتتارىنا قاتىستى اقپارات الماسۋ تۋرالى كەلىسىمدى راتيفيكاسيالاۋ تۋرالى» زاڭ جوباسى ماقۇلداندى.
كەلىسىمدى راتيفيكاسيالاۋ قازاقستان رەسپۋبليكاسى مەن جۇڭگو حالىق رەسپۋبليكاسىنىڭ كوشى-قون جانە قوس ازاماتتىققا قارسى ءىس-قيمىل سالاسىنداعى قۇزىرەتتى ورگاندارى اراسىنداعى ىنتىماقتاستىق ءۇشىن قۇقىقتىق نەگىز قالىپتاستىرۋعا مۇمكىندىك بەرەدى. كەلىسىم تاراپتار مەملەكەتتەرىنىڭ ازاماتتارىنا قاتىستى كوشى-قون سالاسىندا اقپارات الماسۋ بويىنشا ءوزارا ءىس-قيمىلدى كوزدەيدى.