پرەمەر-مينيستردىڭ ورىنباسارى سەرىك ءجۇمانعاريننىڭ توراعالىعىمەن وتكەن جيىندا ۇكىمەتتىڭ اۋىل شارۋاشىلىعى جانە قارجى بلوكتارىنىڭ، اكىمدىكتەر وكىلدەرى كەلەسى جىلى شەگىرتكەنىڭ تارالۋىن بولدىرماۋعا ارنالعان دايىندىق جۇمىستارىنىڭ جاعدايىن تالقىلادى، دەپ حابارلايدى Almaty-akshamy.kz.
رەسپۋبليكالىق فيتوسانيتارلىق دياگنوستيكا جانە بولجامدار ادىستەمەلىك ورتالىعىنىڭ دەرەكتەرى بويىنشا 2023-2024 جىلدار شەگىرتكەلەردىڭ تارالۋ سيكلىنىڭ 11 جىلدىق شارىقتاۋ شەگى بولماق. سوڭعى رەت كەرى ديناميكانىڭ ءوسۋى 2014 جىلى بايقالدى. ودان كەيىن زيانكەستەردىڭ تارالۋ اۋماعى ۇزدىكسىز ازايعانمەن، 2021 جىلدان بەرى قاراي قايتادان ۇلعايا باستادى. 2024 جىلى 2،5 ملن گەكتار القاپقا شەگىرتكە شوعىرى تارالۋى مۇمكىن دەگەن بولجام بار. بۇل 2023 جىلعا قاراعاندا (1،6 ملن گا) 1،5 ەسە كوپ. شەگىرتكەلەر شوعىرى اقتوبە، قوستاناي، تۇركىستان، جامبىل وبلىستارىندا كوپ تارالادى دەپ كۇتىلۋدە.
اۋىل شارۋاشىلىعى ۆيسە-مينيسترى ءابىلقايىر تامابەكتىڭ مالىمەتىنشە، 2024 جىلعا بولىنگەن 4،2 ملرد تەڭگە قارجى جوبالانعان جەر كولەمىنىڭ جارتىسىن عانا وڭدەۋگە جەتەدى. شەگىرتكە زيانكەستەرىنىڭ تارالۋ الاڭىنىڭ بولجامدى كولەمىنە وڭدەۋ جۇمىستارىن جۇرگىزۋ ءۇشىن ارنايى بۇرىككىش تەحنيكانىڭ سانىن ارتتىرۋ قاجەت بولادى. پەستيسيدتەردىڭ قولدا بار قورىنان بولەك قوسىمشا قارجى ءبولىنۋى كەرەك.
«شەگىرتكەنىڭ تارالۋىنا قارسى كۇرەسكە دايىندىقتى كوكتەمدە كەش بولماس ءۇشىن ءقازىر باستاۋ كەرەك. اۋىل شارۋاشىلىعى مينيسترلىگى مەملەكەتتىك ساتىپ الۋدى ۋاقتىلى وتكىزىپ، شەگىرتكەگە قارسى ءىس-شارالاردى اتقارۋعا تىڭعىلىقتى دايىندىقتى قامتاماسىز ەتۋى قاجەت. ال قارجى مينيسترلىگى مەن اكىمدىكتەر شەگىرتكەدەن قورعانۋ شارالارىن ۇيىمداستىرۋ ءۇشىن قوسىمشا قارجى ءبولۋى كەرەك»، - دەپ قورىتىندىلادى ءسوزىن سەرىك جۇمانعارين.