بۇل تۋرالى ءماجىلىس دەپۋتاتى «AMANAT» پارتياسىنىڭ جانىنداعى سىبايلاس جەمقورلىققا قارسى ءىس-قيمىل جونىندەگى رەسپۋبليكالىق كەڭەستىڭ اتىراۋ قالاسىندا وتكەن كوشپەلى وتىرىسى بارىسىندا ايتتى، دەپ حابارلايدى Almaty-akshamy.kz AMANAT پارتياسىنىڭ تەلەگرام-كانالىنا سىلتەمە جاساپ.
ول پارتيا جانىنداعى كەڭەستىڭ مۇشەلەرى رەسپۋبليكاعا بەلگىلى زاڭگەرلەر، مەملەكەت قايراتكەرلەرى مەن قوعام بەلسەندىلەرى جانە دەپۋتاتتار ەكەنىن العا تارتتى. ونىڭ ايتۋىنشا، جەمقورلىققا قارسى كەڭەس ءوز جۇمىسى بارىسىندا تەك وڭىرلەردەگى پروبلەمالارعا عانا ەمەس، ەلىمىزدە ازاماتتار كەڭ تالقىلاپ جۇرگەن ەڭ رەزونانستى ماسەلەلەرگە باسا ءمان بەرەدى. وسى ورايدا كەڭەس ءتوراعاسى جينالعانداردىڭ نازارىن روپ وپەراتورىنا قاتىستى ماسەلەگە اۋداردى.
«ادىلەتتى قازاقستاننىڭ كىرپىشى زاڭدى ورىنداۋداعى شىندىقتان قۇرالادى. بارلىعى زاڭ جانە زاڭدى قۇقىققا سايكەس بولۋى كەرەك. بارشامىزعا بەلگىلى جاقىندا روپ دەپ اتالاتىن ۇيىم باسشىلارىنىڭ ءبىرقاتارى قىلمىستىق جاۋاپقا تارتىلدى. سوت بارىسىندا كوپتەگەن كۋاگەرلەر جەمقورلىققا قارجىنىڭ تۇپكى بەنەفيسيارى ءاليا نازاربايەۆا دەپ كورسەتتى. ءبىراق سوت تا، باس پروكۋراتۋرا وكىلدەرى دە سوت پروسەسىندە بۇل ازاماتتاردىڭ ۋاجىنە ەشقانداي نازار اۋدارمادى. ەگەر قازاقستاندا ادىلەتتى قوعام ورناتامىز دەسەك، وزىنە قاتىستى وسىنداي كۋاگەرلىك بەرىلگەن ءاربىر ازامات كىناسىزدىگىن سوتقا كەلىپ دالەلدەۋى قاجەت»، - دەدى دەپۋتات.
سونداي-اق ول ازاماتتاردىڭ ءۋاجىن مىندەتتى تۇردە باس پروكۋراتۋراعا جەتكىزەتىنىن جانە بۇل ماسەلە كەڭەستىڭ باقىلاۋىندا بولاتىنىن العا تارتتى.