ەلەكتروندى كوممەرسيانىڭ قارقىندى دامۋى ترانسشەكارالىق ساۋدا-ساتتىقتى ايتارلىقتاي ءتيىمدى ءارى قولجەتىمدى ەتتى. بۇل سالانىڭ دامۋى الەمدەگى نارىقتاردى دا بىرىكتىرە ءتۇستى. قازىرگى تاڭدا كوپتەگەن ەلدەردىڭ ازاماتتارى جۇڭگولىق ەلەكتروندى كوممەرسيا پلاتفورمالارىنان ءتۇرلى ونىمدەر ساتىپ الىپ، الەمدىك نارىققا ەركىن قول جەتكىزىپ وتىر. ەلەكترونيكادان باستاپ كيىم-كەشەك، تۇرمىستىق تەحنيكا مەن اكسەسسۋارلارعا دەيىنگى كەڭ اۋقىمدى تاۋارلار قولجەتىمدى. بۇل قۇبىلىستىڭ باستى سەبەبى – قىتايلىق ينتەرنەت-دۇكەندەردىڭ تارتىمدى باعا مەن اۋقىمدى اسسورتيمەنت ۇسىنۋىندا. ولار تۇتىنۋشىلارعا الەمنىڭ كەز كەلگەن تۇكپىرىنەن قاجەتتى ونىمدەردى تەز ءارى جەڭىل ساتىپ الۋ مۇمكىندىگىن بەرەدى.
دەگەنمەن، بۇل ۇدەرىس وزىمەن بىرگە جاڭا قيىندىقتاردى دا الا كەلدى. قىتايلىق ماركەتپلەيستەر، اسىرەسە Temu، Pinduoduo جانە Taobao پلاتفورمالارى الەمدىك نارىقتا ءۇستەمدىككە يە بولا وتىرىپ، جەرگىلىكتى شاعىن جانە ورتا بيزنەسكە قىسىمدى كۇشەيتتى. بۇل ماركەتپلەيستەر وزدەرىنىڭ تومەن باعالارى مەن ۇنەمى ۇسىناتىن جەڭىلدىكتەرى ارقىلى تۇتىنۋشىلاردىڭ نازارىن جاۋلاپ الىپ، ءداسءتۇرلى ساۋدا كاسىپكەرلەرىن نارىقتان ىعىستىرۋ ۇستىندە. قازىرگى تاڭدا بۇل پروسەسس تولىقتاي جۇزەگە اسپاعانىمەن، ول كەزەڭ-كەزەڭىمەن ورىن الۋى ابدەن مۇمكىن.
قىتايلىق ماركەتپلەيستەر قازىرگى ۋاقىتتا يننوۆاسيالىق ساۋدا ۇلگىلەرىن ۇسىنۋدا. بۇل ءوز كەزەگىندە الەمدىك نارىققا تەز ەنۋىنە مۇمكىندىك بەرىپ وتىر. مىسالى، Pinduoduo پلاتفورماسى تۇتىنۋشىلار ءوز كەرەگىن ساتىپ الا وتىرىپ قوسىمشا جەڭىلدىكتەر ۇسىنىپ، ىنتالاندىرادى. Temu پلاتفورماسى ارزان باعامەن تاۋار ۇسىنىپ، جەتكىزۋ قىزمەتىن تەگىن كورسەتۋمەن نارىقتى باۋرايدى. بۇل تاسىلدەر پلاتفورمالاردىڭ قولدانۋشىلار سانىن ارتتىرۋدا ۇلكەن ءرول اتقارىپ وتىر. وسى ارقىلى قىتايلىق ساۋدا سايتتارى الەمدىك نارىقتا كەڭىنەن تانىلىپ ۇلگەردى. اقش، ەۋروپا، وڭتۇستىك-شىعىس ازيا، ءتىپتى قازاقستان سياقتى دامۋشى ەلدەردە دە ۇلكەن سۇرانىسقا يە.
اتالعان پلاتفورمالاردىڭ ۇلكەن نارىققا شىعۋىنا مۇمكىندىك بەرگەن ەڭ نەگىزگى ارتىقشىلىعى قانداي؟ ەڭ الدىمەن، قولجەتىمدى باعا ۇسىنۋىن اتاۋعا تۋرا كەلەدى. تومەن باعا كەز كەلگەن ەلدەگى نارىقتا باستى ءرول وينايدى. ەكىنشى ورىندا ءتۇرلى ماركەتينگ تاسىلدەر، ياعني ۇدايى ۇيىمداستىرىلاتىن جەڭىلدىكتەر مەن اكسيالار. بۇل ماركەتينگتىك ناۋقاندار ادامداردىڭ تۇتىنۋشىلىق ىنتاسىن وياتۋعا بارىنشا پايدالانىلىپ جاتىر. پلاتفورمالاردىڭ تاعى ءبىر باستى ارتىقشىلىعى – جوعارى ساپاداعى لوگيستيكا. جۇڭگو ۇكىمەتى لوگيستيكالىق ينفراقۇرىلىمعا ۇلكەن ينۆەستي-
سيالار قۇيىپ، جاھاندىق جەتكىزۋ جەلىسىن ءتيىمدى ۇيىمداستىردى. بۇل ساۋدا پلاتفورمالارىنىڭ حالىقارالىق نارىقتا باسەكەگە قابىلەتتى بولۋىنا زور اسەر ەتۋدە.
اتاپ وتكەنىمىزدەي، بۇل جاڭا ساۋدا تارماقتارى ءار ەلدەگى شاعىن جانە ورتا بيزنەسكە كەرى اسەرلەرىن تيگىزۋدە. پلاتفورمالارداعى تاۋارلاردىڭ ارزان باعالارى جەرگىلىكتى كاسىپكەرلەردى باعانى تومەندەتۋگە ءماجبۇر ەتتى. بۇل ءوز كەزەگىندە ولاردىڭ مارجاسىنىڭ ازايۋىنا جانە قارجىلىق قيىندىقتارعا اكەءلۋى مۇمكىن. ءوز ماركەتينگتىك ستراتەگيالارىنا ميللياردتاعان دوللار جۇمساعان قىتايلىق پلاتفورمالارمەن جەرگىلىكتى ورتا-شاعىن بيزنەستىڭ باسەكەلەسۋى قيىن. دەگەنمەن، بۇل ەلىمىزدە ورتا-شاعىن بيزنەستىڭ جاڭا قىرىنان دامۋىنا دا ءوز اسەرىن بەرىپ جاتقانىن كورە الامىز. ايتالىق، وتاندىق كاسىپكەرلەر ەلدىڭ ءتيىمدى ارتىقشىلىقتارىن پايدالانىپ، لوگيستيكالىق قىزمەت تۇرلەرىن دامىتۋعا مۇمكىندىك العانداي. سالا وكىلدەرىنىڭ پىكىرىنە نازار اۋدارىڭىز.
تاقىرىپقا وراي
ءىنجۋ قانات، قىتايمەن ساۋدا جاسايتىن جەكە كاسىپكەر:
بۇل سايتتاردىڭ كەمشىلىكتەرىنەن گورى ارتىقشىلىقتارى الدەقايدا كوپ. سەبەبى، وسى پلاتفورمالار قازاقستانعا كەلگەننەن بەرى كوپتەگەن ادامدار ءۇشىن جاڭا تابىس كوزدەرى اشىلدى. جەكە كاسىپپەن اينالىسقىسى كەلگەندەر وسى سايتتاردى پايدالانۋ ارقىلى، وزدەرىنىڭ تاسىمالداۋشى كارگولارىن ۇيىمداستىرىپ، وزدەرىنىڭ بيزنەستەرىن باستاپ كەتتى. مەن بۇل سالانى العاش رەت YouTube ارقىلى ۇيرەنىپ، اقشا تابا باستادىم. شاعىن قالادا تۇرىپ تا، ۇيدە وتىرىپ باستاعان شاعىن بيزنەسىم ءقازىر جاقسى دامىپ كەلەدى. جانە دە جوعارى ناتيجەلەر كورسەتكىشىنىڭ ارقاسىندا ورتالىقتان جەكە قويمامدى اشتىم. باستاپقىدا تاۋاردى كۇتۋ مەرزىمى بىر-ەكى ايعا دەيىن سوزىلاتىن، ال ءقازىر ەكى اپتا ىشىندە ادامدار ءوز تاپسىرىستارىن قولدارىنا الادى. بولاشاقتا ءداسءتۇرلى ساۋدادان گورى ونلاين ساۋدانىڭ ۇلەسى ايتارلىقتاي ارتىپ، وسى باعىتتا جۇمىس ىستەيتىندەردىڭ سانى ودان ءارى كوبەيەتىنىنە سەنىمدىمىن.
حابدي ارۋجان مۇراتبەك قىزى: JANA post كومپانياسى ماركەتينگ ءبولىمنىڭ سمم مامانى:
JANA Post جۇڭگو حالىق رەسپۋبليكاسىنىڭ كەز كەلگەن نۇكتەسىنەن ءسالەمدەمەلەردى دەلدالسىز، جىلدام ءارى ارزان تۇردە جەتكىزىپ كەلەدى. قازاقستاندىقتارعا وسىنداي قىزمەت كورسەتىپ كەلە جاتقانىنا ءبىر جىلعا جۋىق ۋاقىت ءوتتى. JANA Post ارقىلى جۇڭگو سايتتارىنان تاۋار ساتىپ العان ءاربىر ادامعا ءتيىمدى ۇسىنىستار مەن جەڭىلدىكتەر قولجەتىمدى. مۇندا كليەنتتەر بونۋستار، پرەميۋم تاۋارلاردى ارزان باعادا الۋ سياقتى كوپتەگەن مۇمكىندىكتەرگە يە بولا الادى. ءقازىر وتاندىق كومپانيامىز ورتالىق ازيا مەن الەمنىڭ وزگە ەلدەرى مەن ايماقتارىن بايلانىستىرىپ، تاۋارلاردىڭ جىلدام ءارى سەنىمدى جەتكىزىلۋىن قامتاماسىز ەتۋگە تىرىسۋدا.
ءبىزدىڭ نەگىزگى ماقساتىمىز – قازاقستان لوگيستيكاسىن سيفرلاندىرۋ. بۇل سالا ءبىزدىڭ نارىقتا پايدا بولعان كەزدەن باستاپ قارقىندى تۇردە زاڭداستىرىلىپ جاتقانىن اتاپ وتكىم كەلەدى. بۇعان دەيىن قازاقستاندىقتار تاۋارلاردى زاڭسىز تاسىمالداۋشىلار ارقىلى شاعىن پاكەتتەرمەن الىپ كەلسە، قازىرگى تاڭدا وسى نيشانى تولىعىمەن زاڭدى تۇردە Jana Post كومپانياسى الىپ وتىر. بۇل ءبىزدىڭ مەملەكەتىمىزدىڭ ءال-اۋقاتى مەن گۇلدەنۋى ءۇشىن وتە ماڭىزدى.