الماتىدا «جول ءجۇرىسى تۋرالى» زاڭعا ەنگىزىلگەن وزگەرىستەرگە سايكەس موپەدتەردى تىركەۋ باستالدى. بۇل تۋرالى وڭىرلىك كوممۋنيكاسيالار قىزمەتىندە وتكەن بريفينگتە الماتى قالاسى پوليسيا دەپارتامەنتى اكىمشىلىك پوليسيا باسقارماسىنىڭ پروسەسسينگ ورتالىعىنىڭ باسشىسى ايدىن مەركىمبايەۆ ءمالىم ەتتى، دەپ حابارلايدى aqshamnews.kz
بيىلعى جىلدىڭ 11 قاڭتارىنان باستاپ موپەد يەلەرى تىركەۋ راسىمىنەن جەڭىلدەتىلگەن تارتىپپەن وتە الادى. ق ر ىشكى ىستەر مينيسترلىگى قاجەتتى قۇجاتتاردىڭ تىزبەسىن ازىرلەدى. موپەدتىڭ جاقتاۋىندا سايكەستەندىرۋ ءنومىرى بولماسا دا تىركەۋگە رۇقسات ەتىلەدى. ەلىمىزدەگى العاشقى تىركەلگەن ەكى دوڭگەلەكتى كولىك وتكەن اپتادا الماتىدا تەحنيكالىق پاسپورت پەن مەملەكەتتىك تىركەۋ ءنومىرىن الدى.
ءقازىردىڭ وزىندە قالادا 60 موپەد رەسمي تىركەۋدەن وتكەن. پوليسيا موپەد يەلەرىنە ارنالعان اقپاراتتىق جادىنامالار مەن قۇجاتتار ءتىزىمى كورسەتىلگەن كىتاپشالاردى تاراتۋدا. ماتەريالدار ترانسپورت يەلەرى كوپ جينالاتىن جەرلەردە، سونداي-اق بۇقارالىق اقپارات قۇرالدارى مەن الەۋمەتتىك جەلىلەر ارقىلى قول جەتىمدى.
2025 جىلدىڭ 5 ساۋىرىندە كۇشىنە ەنەتىن جاڭا زاڭنامالىق تۇزەتۋلەرگە سايكەس، موپەدتەر مەحانيكالىق اۆتوكولىكتەرگە تەڭەستىرىلەدى. مۇنداي كولىكتى پايدالانۋعا پوليسيادا تىركەۋدەن وتكەن جاعدايدا عانا رۇقسات ەتىلەدى. سونىمەن قاتار، موپەد يەلەرى ا1 ساناتىنداعى جۇرگىزۋشى كۋالىگىن الۋى ءتيىس.
ايدىن مەركىمبايەۆتىڭ ايتۋىنشا تىركەۋ ەكساۋماقتىق قاعيداتى بويىنشا جۇزەگە اسىرىلادى جانە بارلىق موپەد يەلەرى ءۇشىن پروسەستى جەڭىلدەتەدى. الماتى پوليسياسى زاڭناما تالاپتارىن ساقتاۋدىڭ ماڭىزدىلىعىن ەسكە سالىپ، جۇرگىزۋشىلەردى بولاشاقتا بولۋى مۇمكىن قۇقىق بۇزۋشىلىقتاردىڭ الدىن الۋ ءۇشىن تىركەۋ راسىمىنەن ۋاقتىلى وتۋگە شاقىرادى.