جارىسقا 19 كوللەدجدىڭ كوماندالارى قاتىسىپ، 7 ءتۇرلى سپورت تۇرىنەن سايىسقا ءتۇستى
9 قاڭتار كۇنى باستالعان الماتى قالاسى مەملەكەتتىك كوللەدجدەرىنىڭ وقىتۋشىلارى مەن قىزمەتكەرلەرى اراسىندا وتكەن قالالىق 28-سپارتاكيادا ءوز مارەسىنە جەتتى. جارىسقا 19 كوللەدجدىڭ كوماندالارى قاتىسىپ، 7 ءتۇرلى سپورت تۇرىنەن سايىسقا تۇسكەن بولاتىن. اتاپ ايتقاندا، باسكەتبول، شاحمات (شاشكى)، توعىزكۇمالاق، ۇستەل تەننيسى، ۆولەيبول، فۋتبول جانە ۇلتتىق ويىندار (اسىق اتۋ، دارتس، بۇقا تارتىس، ارقان تارتىس).
ءبىلىم باسقارماسىنا قاراستى قالالىق دەنەشىنىقتىرۋ جانە وقۋ-تاجىريبەلىك ورتالىعىنىڭ سپورت ادىسكەرى نۇرعالي ورىنعالييەۆتىڭ ايتۋىنشا، سپارتاكيادا ۇلتتىق سپورت تۇرلەرىن تانىمال ەتۋ، سالاۋاتتى ءومىر سالتىن ناسيحاتتاۋ، الماتى قالاسى كوللەدجدەرى وقىتۋشىلارىنىڭ اراسىندا دوستىق قارىم-قاتىناستى نىعايتۋ ماقساتىندا ۇيىمداستىرىلدى.
– سپارتاكيادا جوعارى دەڭگەيدە ءوتتى، وتە تارتىستى جارىس بولدى. ءوزىن جاقسى كورسەتە بىلگەن ۇجىمدار جەڭىسكە جەتتى. ەندى رەسپۋبليكالىق دارەجەدە كوللەدج ستۋدەنتتەرى اراسىندا جارىس وتكىزۋدى جوسپارلاپ وتىر. ال وسى قالالىق سپارتاكيادادا ۇزدىك بولعان ادامدار ىرىكتەلىپ، رەسپۋبليكالىق جارىسقا جىبەرىلەدى. جالپى، بۇل سپورتتىق ءىس-شارالارىمىز كوللەدج مۇعالىمدەرى مەن قىزمەتكەرلەرىنە ۇنادى دەپ ويلايمىز. ولار وسىنداي ءىس-شارالاردان سەرگىپ، جىگەر-كۇش الادى. كولل ەدج ستۋدەنتتەرى ءۇشىن دە ۇستازدارىنىڭ وسىنداي جارىستاردا جەڭىسكە جەتۋى سەرپىن بەرەدى، – دەدى نۇرعالي ورىنعالييەۆ.
سپارتاكيادا ناتيجەسى بويىنشا جالپىكوماندالىق ءبىرىنشى ورىنعا الماتى ەنەرگەتيكا جانە ەلەكتروندى تەحنولوگيالار كوللەدجى يە بولدى. ەكىنشى ساتىدان الماتى كولىك جانە كوممۋنيكاسيالار كوللەدجى كورىندى. جالپىكوماندالىق ءۇشىنشى ورىن الماتى پوليتەحنيكالىق كوللەدجىنە بۇيىرسا، الماتى مەملەكەتتىك سەرۆيس جانە تەحنولوگيا كوللەدجى 4-ورىنعا جايعاستى.
– بۇل جارىس جىل سايىنان نەگىزىنەن ەرلەر اراسىندا وتەتىن. ءبىراق بيىل سپارتاكياداعا قىزدار دا قوسىلدى. جالپى، ەر جىگىتتەر 5 سپورت تۇرىنەن، قىزدار 3 سپورت تۇرىنەن ب ا ق سىنادى.
سونداي-اق، ۇلتتىق سپورت تۇرلەرىنە ەرەكشە كوڭىل ءبولىندى. بارلىعى 7 ءسپورتتۇرىنىڭ تورتەۋىنەن الماتى ەنەرگەتيكا جانە ەلەكتروندى تەحنولوگيالار كوللەدجى جەڭىسكە جەتىپ، وسىلايشا جالپىكوماندالىق ءبىرىنشى ورىنعا يە بولدى، – دەدى الماتى ەنەرگەتيكا جانە ەلەكتروندى تەحنولوگيالار كوللەدجى ديرەكتورىنىڭ تاربيە ءىسى جونىندەگى ورىنباسارى اسحات جانبوسىنوۆ.
