ساتبايەۆ ۋنيۆەرسيتەتىنىڭ ءو.ا.بايقوڭىروۆ اتىنداعىتاۋ-كەن مەتاللۋرگيا ينستيتۋتىندا «يننوۆاسيالىق تەحنولوگيالار جانە جاڭا بەيورگانيكالىق ماتەريالدار» ءبىلىم بەرۋ باعدارلاماسى بويىنشا جۇڭگو حالىق رەسپۋبليكاسىنان كەلگەن بەس دوكتورانت ءبىلىم الۋدا.
سيۋي چجۋانچجۋان، گاو ليلي، ليۋ سزينسزين، گو سياوحۋن جانە لي سزيا «حيميالىق پروسەستەر جانە ونەركاسىپتىك ەكولوگيا» كافەدراسىندا ءبىلىم الىپ جاتىر، دەپ حابارلايدى aqshamnews.kz عىلىم جانە جوعارى ءبىلىم مينيترلىگىنە سىلتەمە جاساپ.
جاس عالىمدار اعىندى سۋلاردى تازارتۋ ءۇشىن يننوۆاسيالىق ماتەريالداردى پايدالانۋ، نانو- جانە كومپوزيتتىك ماتەريالداردى، سونداي-اق ەكولوگيا مەن وندىرىستەگى زاماناۋي تەحنولوگيالاردى زەرتتەۋلەرمەن اينالىسۋدا. ولار وقۋ مەن زەرتتەۋ جۇرگىزۋ ءۇشىن قولايلى جاعداي جاساعانى ءۇشىن جانە قازاقستان، جۇڭگو، مالايزيا، پولشا جانە ۇلىبريتانيادان كەلگەن جەتەكشى عالىمداردىڭ باسشىلىعىمەن جۇمىس ىستەۋگە مۇمكىندىك بەرگەنى ءۇشىن ۋنيۆەرسيتەتكە العىستارىن ءبىلدىردى.
- قازاقستانعا كەلگەنىمە ءبىر اي عانا بولسا دا، ءبىز كوپتەگەن جاڭا دوستار تاۋىپ، ۋاقىتتى قىزىقتى وتكىزدىك. كەلەشەكتە كومىرتەگى نەگىزىندەگى ماتەريالداردى سينتەزدەپ، ولاردى ەنەرگيا ساقتاۋ جۇيەلەرىنىڭ بارلىق تۇرلەرىنە قولدانۋدى جوسپارلاپ وتىرمىن. بىزگە قولداۋ كورسەتكەن توپ مۇشەلەرىنە العىسىم شەكسىز، اسىرەسە PhD دوكتورلارى قىدىر اسقار ۇلى مەن سەرىكتەسىم ەلريزاعا ريزاشىلىعىمدى بىلدىرەمىن. جۇڭگو مەن قازاقستان اراسىنداعى دوستىعىمىز نىعايا بەرسىن دەپ تىلەيمىن! - دەدى شاندۋن پروۆينسياسىنان كەلگەن 1-كۋرس دوكتورانتى ليۋ سزينسزين.
جاس عالىم قازاقستاندىق جانە بريتاندىق جەتەكشىلەردىڭ باسشىلىعىمەن «ەلەكتروحيميالىق ەنەرگيانى ساقتاۋ قۇرىلعىلارى ءۇشىن جوعارى ءتيىمدى ەلەكترودتىق ماتەريالداردى ازىرلەۋ» تاقىرىبىنداعى ديسسەرتاسياسىن ازىرلەۋدە.
قىتايدان كەلگەن تاعى ءبىر دوكتورانت سيۋي چجۋانچجۋان دا «يننوۆاسيالىق تەحنولوگيالار جانە جاڭا بەيورگانيكالىق ماتەريالدار» ماماندىعى بويىنشا 1-كۋرستا وقىپ ءجۇر. ول ساتبايەۆ ۋنيۆەرسيتەتىنىڭ پروفەسسورى ازات سەيىتحان مەن مالايزيادان كەلگەن پروفەسسور نۇر نابيح يۋسۋفتىڭ جەتەكشىلىگىمەن «نانوماگنيتتىك سەوليتتى الۋ جانە ونىڭ نانوپلاستيكتەرىنىڭ ادسوربسيالاۋ قاسيەتتەرىن زەرتتەۋ» تاقىرىبىندا عىلىمي جۇمىس جۇرگىزۋدە.