بۇرىن بۇل جەردە تابيعي پوليگون بولعان.
الماتى اكىمى ەربولات دوسايەۆ جۇمىس ساپارى جانە حالىقپەن كەزدەسۋ بارىسىندا جەتىسۋ اۋدانىنداعى «حالىق قاتىساتىن بيۋدجەت» باعدارلاماسى اياسىندا اباتتاندىرىلعان جاسىل ايماقتى ارالاپ كوردى، دەپ حابارلايدى aqshamnews.kz
بۇل نىسان قالانىڭ جەتىسۋ اۋدانىنداعى ۋسسۋرييسكايا كوشەسىندە ورنالاسقان.
«حالىق قاتىساتىن بيۋدجەت» باعدارلاماسىنىڭ ارقاسىندا ءبىز ءوز يدەيالارىمىزدى ۇسىنا الدىق. كوشە تانىماستاي وزگەردى، جايلى جانە تۇرۋعا تارتىمدى بولدى»، - دەپ اتاپ ءوتتى جەرگىلىكتى تۇرعىن.
جوبا اياسىندا ءبىر شاقىرىمنان استام تروتۋار سالىندى، اۋدانى 220 ش. م. فۋتبول الاڭى جابدىقتالدى، سونداي-اق 750 ش. م. اۋماعىندا بالالار جانە سپورت الاڭدارى ورناتىلدى.
جوبامەن تانىسقان ەربولات دوسايەۆ مەگاپوليس تۇرعىندارى ءۇشىن قولايلى قالالىق ورتا قۇرۋ جۇمىستارى جالعاساتىنىن اتاپ ءوتتى.
ءوز كەزەگىندە اۋدان تۇرعىندارى قالا باسشىسىنا ەرەسەكتەر مەن بالالاردىڭ دەمالۋىنا، جايلى سەرۋەندەۋگە قولايلى جاعداي جاساعانى ءۇشىن العىستارىن ءبىلدىردى. ولاردىڭ وتىنىشتەرى بويىنشا بيىل «حالىق قاتىساتىن بيۋدجەت» باعدارلاماسى اياسىندا كرىلوۆ، وماروۆ، بوتكين، بوكەيحانوۆ، نازاربايەۆ، رايىمبەك داڭعىلدارىنداعى سكۆەرلەرگە اعىمداعى جوندەۋ جۇرگىزىلدى.
«قالادا بوس جەر ۋچاسكەلەرى جوق، سوندىقتان كەلەسى جىلى ءبىز ساياباق نەمەسە سكۆەر قالىپتاستىرۋ ءۇشىن ءتىپتى شاعىن ۋچاسكەلەرگە اعاش وتىرعىزۋدى باستايمىز. ءبىز 5 نەمەسە 10 اكر جەر ۋچاسكەلەرىن قولدانامىز، ولاردى اباتتاندىرىپ، سەرۋەندەۋگە ارنالعان ورىندارعا اينالدىرامىز. مۇنداي باعدارلامانى بۇكىل قالا بويىنشا جۇزەگە اسىرۋدى جوسپارلاپ وتىرمىز»، - دەدى ەربولات دوسايەۆ اۋدان تۇرعىندارىمەن كەزدەسۋ بارىسىندا.
ايتا كەتەيىك، مەگاپوليستە «حالىق قاتىساتىن بيۋدجەت» باعدارلاماسى بەلسەندى جۇزەگە اسىرىلۋدا. اعىمداعى جىلى جوباعا 18،8 ملرد تەڭگە ءبولىندى، بۇل وتكەن جىلمەن سالىستىرعاندا 5،8 ملرد تەڭگەگە ارتىق. قالا تۇرعىندارى اۋلالاردى، قوعامدىق كەڭىستىكتەردى اباتتاندىرۋ، سپورت جانە ويىن الاڭدارىن قۇرۋ بويىنشا 364 جوبانى ۇسىنۋعا جانە ىسكە اسىرۋعا مۇمكىندىك الدى.