قازاقستان مەن جۇڭگو اراسىنداعى عىلىمي-يننوۆاسيالىق سەرىكتەستىك جاڭا كەزەڭگە قادام باستى.
قىتايدىڭ سيان سزياوتۋن ۋنيۆەرسيتەتىندە «ءبىر بەلدەۋ – ءبىر جول» باستاماسىنىڭ وزىق عىلىمي-تەحنولوگيالىق جەتىستىكتەرىمەن الماسۋ جونىندەگى حالىقارالىق كونفەرەنسيا ۇيىمداستىرىلدى، - دەپ حابارلايدى Aqshamnews.kz.
كونفەرەنسيا اياسىندا سيان سزياوتۋن ۋنيۆەرسيتەتى تاراپىنان شاكارىم ۋنيۆەرسيتەتىنە «ەلەكترلىك اۆتوماتتاندىرۋ جونىندەگى قازاقستان-قىتاي بىرلەسكەن زەرتحاناسىنا» ارنالعان جابدىقتاردىڭ العاشقى پارتياسىن بەرۋ تۋرالى ەستەلىك سەرتيفيكات تابىس ەتىلدى. سونداي-اق «شاكارىم» قازاق-قىتاي مادەني زەرتتەۋلەر ورتالىعىنىڭ سالتاناتتى اشىلۋى ءوتتى.
ق ر رەسمي دەلەگاسياسىن ق ر عىلىم جانە جوعارى ءبىلىم ۆيسە-مينيسترى گۇلزات كوبەنوۆا مەن Shakarim University رەكتورى دۋمان ورىنبەكوۆ باستاپ باردى. بىرلەسكەن زەرتحانا اشۋ جونىندەگى كەلىسىمگە 2025 جىلعى 16 ماۋسىمدا استانادا وتكەن «ورتالىق ازيا – جۇڭگو» يندۋستريالىق-ينۆەستيسيالىق ىنتىماقتاستىق فورۋمى اياسىندا قول قويىلعان بولاتىن.
جاڭادان قۇرىلاتىن زەرتحانا ەكى ەل اراسىنداعى تەحنولوگيا الماسۋ مەن وندىرىستىك سەرىكتەستىكتى دامىتۋدا ماڭىزدى ءرول اتقارىپ، عىلىمي جاڭالىقتارعا نەگىزدەلگەن ورتاق ەكونوميكالىق تىزبەكتىڭ دامۋىن جىلدامداتادى. جوبانىڭ نەگىزگى ماقساتى – وڭىردەگى يننوۆاسيالاردى دامىتۋ، ءوندىرىستى جاڭارتۋ جانە عىلىم مەن ءوندىرىس اراسىنداعى بايلانىستى نىعايتۋ.
سونداي-اق زەرتحانا لوگيستيكا سالاسىنداعى جاڭا تەحنولوگيالاردى زەرتتەۋ مەن دامىتۋعا باعىتتالادى. مۇندا اۆتوماتتاندىرۋ، اقىلدى لوگيستيكا جۇيەلەرى مەن لوگيستيكالىق سالانى جەتىلدىرۋگە ارنالعان ارنايى پلاتفورما قۇرىلادى. ول تولىقتاي اباي وبلىسىنىڭ وڭىرلىك يننوۆاسيالىق پلاتفورماسىنا ينتەگراسيالانىپ، قازاقستاندىق ينجەنەرلىك عىلىمنىڭ جاڭا تىنىسىن اشادى دەپ كۇتىلىپ وتىر.
«بۇل زەرتحانا – يدەيادان ناقتى ىسكە اينالعان سەرىكتەستىكتىڭ ايقىن ناتيجەسى. عىلىم مەن تەحنولوگيا سالاسىنداعى وسىنداي ىنتىماقتاستىق – پرەزيدەنت قاسىم-جومارت توقايەۆتىڭ يننوۆاسيالىق دامۋ جانە ينتەللەكتۋالدى ۇلت قالىپتاستىرۋ ستراتەگياسىمەن ۇندەس»، – دەپ اتاپ ءوتتى ۆيسە-مينيستر.
كەزدەسۋدىڭ باستى وقيعاسى سيان سزياوتۋن ۋنيۆەرسيتەتىنىڭ جانىنان «شاكارىم» قازاق-قىتاي مادەني زەرتتەۋلەر ورتالىعىنىڭ اشىلۋى بولدى. بۇل – ۇلى ويشىلدىڭ شىعارماشىلىعى مەن فيلوسوفياسىنا ارنالعان شەتەلدەگى تۇڭعىش ينستيتۋسيونالدى ورتالىق. حالىقارالىق دەڭگەيدە اشىلىپ وتىرعان ورتالىقتىڭ نەگىزگى مىندەتى – قازاقستاننىڭ تاريحى مەن مادەنيەتىن، سونىڭ ىشىندە شاكارىم مۇراسىن تەرەڭ زەردەلەۋ، سونداي-اق بىرلەسكەن ءبىلىم بەرۋ جانە عىلىمي-زەرتتەۋ جوبالارىن ىسكە اسىرۋداعى ءوزارا ءتيىمدى پلاتفورمانى قالىپتاستىرۋ، قازاق مادەنيەتىن قىتايدا كەڭىنەن تانىستىرۋ، ەكى ەل اراسىنداعى مادەني جانە عىلىمي بايلانىستاردى نىعايتۋ.
ورتالىق ق ر عىلىم جانە جوعارى ءبىلىم مينيسترلىگىنىڭ قولداۋىمەن، شاكارىم ۋنيۆەرسيتەتى مەن سيان سزياوتۋن ۋنيۆەرسيتەتىنىڭ سەرىكتەستىگىنىڭ ناتيجەسىندە اشىلىپ وتىر. كەلۋشىلەر ورتالىقتان شاكارىم قۇدايبەردى ۇلىنىڭ ءومىرى مەن مول مۇراسى تۋرالى قازاق جانە جۇڭگو تىلدەرىندە تولىق اقپارات الا الادى. سونىمەن قاتار قازاق حالقىنىڭ ەجەلگى داۋىردەن بۇگىنگە دەيىنگى مادەني دامۋ كەزەڭدەرى تۋرالى ماتەريالدار ۇسىنىلادى.
شاكارىم ۋنيۆەرسيتەتىنىڭ رەكتورى دۋمان ورىنبەكوۆ Xi’an Jiaotong University پرەزيدەنتى چجان ليسيۋنگە جانە ق ر عىلىم جانە جوعارى ءبىلىم مينيسترلىگىنە ەكى ەلدىڭ اكادەميالىق جانە مادەني باستامالارىن سەنىمگە، عىلىمي پروگرەسكە جانە ءوزارا دامۋعا نەگىزدەلگەن ءبىرىڭعاي ستراتەگياعا بىرىكتىرگەنى ءۇشىن شىنايى العىس ءبىلدىردى.
«شاكارىم» قازاق-قىتاي مادەني زەرتتەۋلەر ورتالىعىنىڭ اشىلۋى – ەرەكشە مانگە يە تاريحي قادام. ءبىزدىڭ ۋنيۆەرسيتەت قازاق ويشىلى شاكارىمنىڭ اتىندا. سوندىقتان ورتالىقتىڭ اشىلۋى ءبىز ءۇشىن ۇلكەن جەتىستىك دەپ بىلەمىن. شاكارىم ۋنيۆەرسيتەتى مەن Xi’an Jiaotong University اراسىنداعى سەرىكتەستىك مادەنيەتتەر مەن ۇرپاقتاردى بىرىكتىرەتىن سەنىم مەن دوستىق كەڭىستىگىن قالىپتاستىرادى. وسى ورتالىقتى اشۋعا قىزمەت جاساعان ەكى ۋنيۆەرسيتەت قىزمەتكەرلەرىنە راقمەت ايتامىن. بۇل ورتالىق عىلىمي-مادەني جاعىنان ەكى ەلدىڭ جەتىستىكتەرىن ناسيحاتتاۋعا قىزمەت اتقاراتىنىنا سەنىمدىمىن»، – دەدى ول.