قازاقستاندا ءبىرجولعى زەينەتاقى تولەمدەرىن يپوتەكا بويىنشا نەگىزگى قارىزدى وتەۋگە، اي سايىنعى تولەمدى ازايتۋعا جانە كرەديت مەرزىمىن قىسقارتۋ ءۇشىن پايدالانۋعا رۇقسات ەتىلۋى مۇمكىن.
ونەركاسىپ جانە قۇرىلىس مينيسترلىگى بۇيرىق جوباسىن ازىرلەگەن، -دەپ حابارلايدى Aqshamnews.kz.
قۇجات «اشىق نقا» پورتالىندا جاريالانعان.
قۇجات «قازاقستان رەسپۋبليكاسىنىڭ زاڭناماسىنا سايكەس تۇرعىن ءۇي جاعدايلارىن جاقسارتۋ ءۇشىن ءبىرجولعى زەينەتاقى تولەمدەرىن پايدالانۋ قاعيدالارىن بەكىتۋ تۋرالى» ق ر يندۋستريا جانە ينفراقۇرىلىمدىق دامۋ ءمينيسترىنىڭ 2021 جىلعى 21 قاڭتارداعى № 24 بۇيرىعىنا تۇزەتۋلەر ەنگىزۋدى كوزدەيدى.
جوبا «تۇرعىن ءۇي قاتىناستارى تۋرالى» قازاقستان رەسپۋبليكاسى زاڭىنىڭ 10-2-بابىنىڭ 10-27) تارماقشاسىنا سايكەس ازىرلەنگەن.
-وزگەرىستەردىڭ نەگىزگى ماقساتى قاعيدالاردى جاڭا سالىق كودەكسىنىڭ نورمالارىنا سايكەستەندىرۋ جانە ازاماتتاردىڭ بانكتەر الدىنداعى بورىشتىق جۇكتەمەسىن ازايتۋ. ەندى زەينەتاقى جيناقتارىن نەگىزگى قارىزدى وتەۋ، اي سايىنعى تولەمدى ازايتۋ نەمەسە يپوتەكالىق قارىز مەرزىمىن قىسقارتۋ ءۇشىن پايدالانۋ مۇمكىندىگى ناقتىلانادى، -دەلىنگەن قۇجاتتا.
سونداي-اق قۇجات قابىلدانعان جاعدايدا تۇرعىن ءۇيدى جاقسارتۋ ءۇشىن ءبىرجولعى زەينەتاقى تولەمدەرىن پايدالانۋدىڭ ءتيىمدى تەتىكتەرى بەكىتىلەدى.
اتالعان بۇيرىق 2025 جىلعى 21 قاراشاعا دەيىن قوعامدىق تالقىلاۋعا ۇسىنىلعان.