300 مىڭ تۇرعىن ەۆاكۋاسيالاندى
قىتايدىڭ شىعىسىنداعى سزيانسي پروۆينسياسىندا نوسەر جاۋىنان 2 ملن ادام جاپا شەكتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«سينحۋا» اگەنتتىگىنىڭ مالىمەتىنشە، سزيانسي پروۆينسياسىندا تابيعات توسىن مىنەز تانىتىپ، نوسەر جاڭبىر جاۋعان. بۇل 2،05 ملن تۇرعىننىڭ قالىپتى ءومىر داعدىسىن بۇزدى. 150 مىڭ گەكتار ەگىستىك سۋ استىندا قالدى. ەكونوميكالىق شىعىن 6،79 ملرد يۋاننەن ($1،01 ملرد) اسىپ جىعىلعان.
قىزىل سۋ باسقان ايماقتان شۇعىل تۇردە 300 مىڭ تۇرعىن ەۆاكۋاسيالاندى.
جەرگىلىكتى باق-تىڭ حابارلاۋىنشا، بيلىك العاش رەت سزيانسي پروۆينسياسىندا اۋا رايىنىڭ قولايسىزدىعىنا بايلانىستى قىزىل دەڭگەيدەگى توتەنشە جاعداي جاريالاعان.
ايتا كەتۋ كەرەك، قىتايدا توتەنشە جاعداي 4 دەڭگەي بويىنشا بەلگىلەنەدى: كوك، سارى، قىزىل سارى جانە قىزىل دەڭگەي.