وزبەكستاننىڭ 2 جانە قىرعىزستاننىڭ 6 ازاماتى ۇستالدى
كەيىنگى 1 اپتادا وزبەك-قىرعىز شەكاراسىندا 3 جاسىرىن جەراستى جولى تابىلدى، دەپ حابارلايدى Almaty-akshamy.kz «حابار 24» تەلەارناسىنا سىلتەمە جاساپ.
تۋننەل ارقىلى قىلمىستىق توپ زاڭسىز تاۋار تاسىمالداپ كەلگەن. ءاندىجاندا وسى وقيعاعا قاتىستى وزبەكستاننىڭ 2 جانە قىرعىزستاننىڭ 6 ازاماتى ۇستالىپ، 6-دان 8 جىلعا دەيىن باس بوستاندىعىنان ايىرىلدى. ولار ءبىر مەملەكەتتىڭ اۋماعىنان ەكىنشى ەلگە 1 ملن 641 مىڭ اقش دوللارىن زاڭسىز الىپ وتكەن. تەكسەرۋ كەزىندە جەراستى جولىندا جۇك تاسيتىن جەدەلساتى مەن ەلەكترلى اربا تابىلدى. ال فەرعاناداعى جاعداي ءالى تەرگەلىپ جاتىر.
ۇستالعان ازامات 2 مىڭ 700 دانا ۇيالى تەلەفون تيەلگەن كولىكتى شەكارادان وتكىزبەك بولادى. الايدا كۇدىكتىنى قاۋىپسىزدىك قىزمەتىنىڭ وكىلدەرى توقتاتىپ، ءۇيىن تەكسەرەدى. كورشى ەلگە قاراي قازىلعان ۇزىندىعى 130 مەترلىك تاعى ءبىر تۋننەل سول جەردەن تابىلدى.
«توپ مۇشەلەرى قۇقىق قورعاۋ ورگاندارىنىڭ نازارىنا ىلىكپەس ءۇشىن بايلانىس قۇرالدارىن قولدانعان. ءىرى كولەمدەگى ۆاليۋتانى ەلىمىزدىڭ اۋماعىنا اكەلىپ، ودان كەيىن جەر استى تۋننەلى ارقىلى قىرعىزستانعا نەمەسە كەرى باعىت بويىنشا تاسىمالداپ جۇرگەن»،-دەيدى وزبەكستان مەملەكەتتىك قاۋىپسىزدىك قىزمەتىنىڭ وكىلى ءماحليو ۆاليكۋلوۆا.