شارالار كەشەنىن تالقىلادى.
باس پروكۋرور بەرىك اسىلوۆتىڭ ءتوراعالىق ەتۋىمەن ەكونوميكالىق رەسۋرستاردى زاڭسىز شوعىرلاندىرۋعا قارسى ءىس-قيمىل ماسەلەلەرى جونىندەگى ۆەدومستۆوارالىق كوميسسيانىڭ وتىرىسى ءوتتى، دەپ حابارلايدى Almaty-akshamy.kz.
«وتىرىستى اشقان باس پروكۋرور ءىس-شاراعا قاتىسۋشىلاردىڭ نازارىن مەملەكەت باسشىسى قويعان نەگىزگى مىندەتتەرگە اۋداردى. بۇل – زاڭسىز شىعارىلعان قارجى قاراجاتىن ەلگە قايتارۋ بويىنشا جۇيەلى شارالاردى ازىرلەۋ جانە ىسكە اسىرۋ، سونداي-اق ەكونوميكالىق رەسۋرستاردىڭ مونوپوليالىق (وليگوپوليالىق) شوعىرلانۋىن انىقتاۋ»، - دەلىنگەن باس پروكۋراتۋرانىڭ باسپا ءسوز قىزمەتىنىڭ حابارلاماسىندا.
ولاردى ىسكە اسىرۋ وتاندىق ەكونوميكانى ساۋىقتىرۋعا، كىرىستەردى ءادىل بولۋگە جانە ازاماتتاردىڭ ءومىر ءسۇرۋ دەڭگەيىن ارتتىرۋعا مۋلتيپليكاتيۆتىك اسەر ەتۋى ءتيىس.
وتىرىستا كوميسسيا ءتوراعاسىنىڭ ورىنباسارى – باس پروكۋروردىڭ ورىنباسارى ۇلان بايجانوۆ، سونداي-اق مەملەكەتتىك ورگانداردىڭ ءبىرىنشى باسشىلارى بايانداما جاسادى.
شارالار كەشەنىن تالقىلاي وتىرىپ، كاپيتالدى ەلدەن زاڭسىز شىعارۋدى بولدىرماۋ جانە قۇقىققا قارسى جولمەن الىنعان رەسۋرستاردى قولىندا شوعىرلاندىرعان ساناۋلى ادامدار شەڭبەرىنىڭ زاڭسىز بايۋى ءۇشىن جاعدايلاردى جويۋ العاشقى كەزەكتەگى شارالاردىڭ ءبىرى دەپ تانىلدى.
سونداي-اق حالىقارالىق تاجىريبەنى ەسكەرە وتىرىپ، وليگوپوليا سۋبەكتىلەرىنىڭ اكتيۆتەردى مەملەكەتكە قايتارۋ مۇمكىندىگى تۋرالى ۇسىنىس قارالدى.
بۇل رەتتە، بەرىك اسىلوۆ كوميسسيانىڭ جۇمىسى ادال كاسىپكەرلەر ءۇشىن بوگەت بولماۋى قاجەت ەكەندىگىن اتاپ ءوتتى.
«بارلىق شەشىمدەر تەكسەرىلىپ، مۇقيات پىسىقتالعان سوڭ عانا قابىلدانۋى كەرەك»، - دەدى ول.
وتىرىس قورىتىندىسى بويىنشا كوميسسيا جۇمىسىنىڭ باسىم باعىتتارى ايقىندالدى.