قىتايدا ميكوپلازمالىق پنيەۆمونيا ينفەكسياسى سياقتى رەسپيراتورلىق اۋرۋلار تارالىپ جاتىر.
قىتايلىق اقپارات قۇرالدارىنىڭ حابارلاۋىنشا، كوپتەگەن اۋرۋحانا ناۋقاسقا تولى جانە ولاردىڭ كوپشىلىگى – كىشكەنتاي بالالار. الەۋمەتتىك جەلىدە تاراعان بەينەجازبالاردان دارىگەرگە كورىنىپ، دارى-دارمەك الۋ ءۇشىن كەزەك كۇتىپ وتىرعان اتا-انالار مەن بالالاردى كورۋگە بولادى، دەپ حابارلايدى Almaty-akshamy.kz
سوڭعى ەكى ايداعى ەسەپ بويىنشا، قىتايدىڭ وڭتۇستىگىندەگى چجەسزيان پروۆينسياسىندا ميكوپلازمالىق پنيەۆمونيا ينفەكسياسىن جۇقتىرعان بالالار سانى وتكەن جىلدىڭ سايكەس كەزەڭىمەن سالىستىرعاندا 17،8 ەسە وسكەن. ال جۇڭگو استاناسى بەيجىڭدە ءبىر اۋرۋحانا كۇنىنە 7 مىڭنان استام ناۋقاستى قابىلداعان.
دۇنيەجۇزىلىك دەنساۋلىق ساقتاۋ ۇيىمى قىتايعا رەسپيراتورلىق اۋرۋلار مەن بالالارداعى پنيەۆمونيانىڭ ءورشۋى تۋرالى تولىق اقپارات الۋ ءۇشىن رەسمي سۇراۋ جىبەردى.
دۇنيەجۇزىلىك دەنساۋلىق ساقتاۋ ۇيىمى جۇڭگو بيلىگى رەسپيراتورلىق اۋرۋلاردىڭ كوبەيۋىن COVID-19 شەكتەۋلەرىنىڭ جويىلۋىمەن جانە بەلگىلى پاتوگەندەردىڭ اينالىمىمەن بايلانىستىرادى دەپ مالىمدەدى.