2025 جىلعى 21 قازاندا استانا قالاسىنا قىتايدان اتپەن شىققان ساياحاتشىلار - قۋانبەك ءتۇسىپحان ۇلى مەن جۇبايى جاينا ەركىن قىزى ەلورداعا جەتتى.
تارباعاتاي وڭىرىنەن شىققان جاس جۇبايلاردىڭ باستى ارمانى - قازاق ەلىنىڭ جۇرەگى، باس قالاسى استانانى كورۋ بولعان.
ەكى ايدان استام ۋاقىت بويى مىڭداعان شاقىرىم جول ءجۇرىپ كەلگەن جۇپتى «AMANAT» پارتياسى استانا قالالىق فيليالىنىڭ اتقارۋشى حاتشىسى مۇحاممەد بولىسبەك ارنايى قابىلداپ، قۇرمەت كورسەتتى.
«قۋانبەك پەن جاينانىڭ بۇل ساپارى – وتانسۇيگىشتىك پەن رۋحاني بايلانىستىڭ ەرەكشە ۇلگىسى. اتا-بابا ىزىمەن ات جالىندا ءجۇرىپ، ەلورداعا جەتۋ - ۇلكەن ەرلىك. ءبىز مۇنداي ازاماتتاردى ءاردايىم قولدايمىز. بۇل ساپار - رەسپۋبليكا كۇنى قارساڭىندا كوڭىل تولقىتقان ەرەكشە وقيعا بولدى»، – دەيدى «AMANAT» پارتياسى استانا قالالىق فيليالىنىڭ اتقارۋشى حاتشىسى مۇحاممەد بولىسبەك.
كەزدەسۋ بارىسىندا پارتيا وكىلدەرى ساياحاتشىلارعا استانا قالاسىنىڭ دامۋى مەن ەلدەگى جاڭالىقتار تۋرالى ايتىپ، ەستەلىك سىيلىقتار تابىس ەتتى.
«ءبىزدىڭ ارمانداعان استانامىز – ءدال وسىنداي ەڭسەلى، كوركەيگەن، رۋحى بيىك قالا ەكەن. اتا جۇرتقا، قازاق ەلىنە دەگەن ساعىنىش پەن قۇرمەت – ءبىزدى جول بويعى قيىندىقتارعا مويىتقان جوق. ەڭ باستىسى - تۋعان ەلدىڭ توپىراعىنا تابان تيگىزىپ، جۇرەكپەن سەزىنۋ»، - دەپ اعىنان جارىلدى قۋانبەك ءتۇسىپحان ۇلى.
جاينا ەركىن قىزى دا ەلوردا تۇرعىندارىنا كورسەتكەن قۇرمەت پەن قولداۋ ءۇشىن العىسىن ءبىلدىردى.
ايتا كەتەيىك، قۋانبەك ءتۇسىپحان ۇلى مەن جاينا ەركىن قىزى 2025 جىلدىڭ 8 تامىزىندا جۇڭگو حالىق رەسپۋبليكاسىنان، ناقتىراق ايتقاندا تارباعاتاي ايماعىنان اتتانىپ، ەكى ايدان استام ۋاقىت ىشىندە بىرنەشە ءوڭىردى ارتقا تاستاپ، ەلورداعا جەتكەن. بۇل - قازاقتىڭ كوشپەلى مادەنيەتىن جاڭعىرتىپ، ۇلتتىق رۋحتى دارىپتەۋدىڭ ەرەكشە ءبىر جولى.