اتاقتى اكتەر ءارى پروديۋسەر دجەكي چان «دوسپەحي بوگا: ۋلتيماتۋم» ءفيلمىنىڭ رەجيسسەرى رەتىندە قازاقستاننان شىققان رەجيسسەر روبەرت كۋندى تاڭدادى، - دەپ حابارلايدى Aqshamnews.kz.
روبەرت كۋن - الەمدىك دەڭگەيدەگى ەكشن-ساحنالاردىڭ قويۋشىسى. ول بۇعان دەيىن Disney، Paramount، Universal جانە 20th Century Fox سەكىلدى جەتەكشى كينوكومپانيالارمەن جۇمىس ىستەگەن. ونىڭ قاتىسۋىمەن تۇسىرىلگەن جوبالار قاتارىندا «وسوبو وپاسەن»، «ون - دراكون»، «پرەزيدەنت لينكولن: وحوتنيك نا ۆامپيروۆ»، «مايور گروم: يگرا» سياقتى فيلمدەر بار.
Salem Entertainment كومپانياسىنىڭ مالىمەتىنشە، «دوسپەحي بوگا: ۋلتيماتۋم» كارتيناسىنىڭ ءتۇسىرىلىم جۇمىستارى 2026 جىلدىڭ كوكتەمىندە باستالادى.
ايتا كەتەيىك، بۇعان دەيىن قازاقستاندىقتار الەۋمەتتىك جەلىدە دجەكي چاننىڭ الماتىدا جۇرگەنىن جارىسا جازعان بولاتىن. جەلى قولدانۋشىلارى ونىڭ ەلىمىزگە كەلۋ ماقساتىنا ءتۇرلى جورامال ايتقان: ءبىرى فۋتبول ماچىن كورۋگە كەلدى دەسە، ەندى ءبىرى ديماش قۇدايبەرگەنمەن كەزدەسۋگە كەلگەن بولار دەپ بولجادى.
الايدا كەيىن بەلگىلى بولعانداي، اكتەر الماتىعا الداعى فيلمىنە لوكاسيا قاراۋ ءۇشىن ارنايى كەلگەن. ياعني، «دوسپەحي بوگا: ۋلتيماتۋم» ءفيلمى قازاقستاندا، ناقتىراق ايتقاندا الماتىدا ءتۇسىرىلۋى مۇمكىن.