قىتايدا مەملەكەتتىك قارجى كومپانياسىنىڭ بۇرىنعى باسشىسى ءولىم جازاسىنا كەسىلدى، دەپ حابارلايدى اqshamnews.kz ءتىلشىسى قحر ورتالىق تەلەارناسىنا سىلتەمە جاساپ.
تەرگەۋ دەرەگىنە سايكەس، 2014–2018 جىلدارى Huarong International مەملەكەتتىك قارجى كومپانياسىنىڭ بۇرىنعى باس ديرەكتورى باي تيانحۋەي وزگە تۇلعالارعا جوبالار ساتىپ الۋعا جانە كورپوراتيۆتىك قارجىلاندىرۋ الۋعا كومەكتەسكەن. وسى قىزمەتىنىڭ "اقىسى" رەتىندە ول جالپى سوماسى 1،108 ملرد يۋان (شامامەن 156 ملن دوللار) بولاتىن اقشا مەن وزگە دە ماتەريالدىق قۇندىلىقتار العان.
2024 جىلدىڭ 28 مامىرىندا تيانسزين قالالىق سوتى باي تيانحۋەيدى پاراقورلىق ءۇشىن كىنالى دەپ تانىپ، وعان ءولىم جازاسىن تاعايىندادى.
2025 جىلدىڭ اقپان ايىندا سوتتالۋشى اپەللياسيا ءتۇسىردى. الايدا ءتيانسزيننىڭ جوعارعى حالىق سوتى ۇكىمدى كۇشىندە قالدىردى. سوت شەشىمىندە الىنعان پارانىڭ مولشەرى "اسا ءىرى"، ال ونىڭ سالدارى "اسا اۋىر" دەپ اتاپ كورسەتىلگەن. ماتەريالدار مىندەتتى تارتىپپەن قىتايدىڭ جوعارعى حالىق سوتىنا جولدانىپ، ول دا ءولىم جازاسىن بەكىتتى.
اقىرعى شەشىم شىققان سوڭ ءتيانسزيننىڭ ەكىنشى ارالىق حالىق سوتى بەلگىلەنگەن ۇكىمدى زاڭعا سايكەس ورىندادى. اقپارات بويىنشا، جازانى ورىنداۋ الدىندا باي تيانحۋەيگە جاقىن تۋىستارىمەن كەزدەسۋگە مۇمكىندىك بەرىلگەن.