مەملەكەت باسشىسى ۇلتتىق بانك ءتوراعاسى تيمۋر سۇلەيمەنوۆتى قابىلدادى

قاسىم-جومارت توقايەۆ ۇلتتىق بانك ءتوراعاسى تيمۋر سۇلەيمەنوۆتى قابىلداپ، ەكونوميكا مەن قارجى جۇيەسىنىڭ جاي-كۇيى، قاڭتار–قاراشا ايلارىندا جۇرگىزىلگەن اقشا-نەسيە ساياساتىنىڭ نەگىزگى باعىتتارى جانە 2026 جىلعا ارنالعان جوسپار جونىندە ەسەپ تىڭدادى.

كەزدەسۋدە ىسكەرلىك بەلسەندىلىك، ينفلياسياعا ىقپال ەتەتىن فاكتورلار جانە باعانى تۇراقتاندىرۋعا ارنالعان شارالار تالقىلاندى. تيمۋر سۇلەيمەنوۆتىڭ ايتۋىنشا، ۇكىمەت، ۇلتتىق بانك جانە قارجى نارىعىن رەتتەۋ جانە دامىتۋ اگەنتتىگى 2026–2028 جىلدارعا ارنالعان ماكروەكونوميكانى تۇراقتاندىرۋ جانە حالىقتىڭ ءال-اۋقاتىن ارتتىرۋ جونىندەگى بىرلەسكەن ءىس-قيمىل باعدارلاماسىن جۇزەگە اسىرۋعا كىرىستى.

ۇلتتىق بانك ءتوراعاسى قارجى، ۆاليۋتا جانە مەملەكەتتىك باعالى قاعازدار نارىعىنداعى جاعداي تۋرالى دا باياندادى. ونىڭ دەرەگىنشە، جىل باسىنان بەرى ۇلتتىق قوردىڭ ۆاليۋتالىق اكتيۆتەرى 4،8 ميلليارد دوللارعا وسكەن. 11 ايداعى ينۆەستيسيالىق تابىس شامامەن 8،2 ميلليارد دوللاردى نەمەسە 13،7 پايىزدى قۇرادى.

ال ەسەپتى كەزەڭدە ەلدىڭ التىن-ۆاليۋتا رەزەرۆتەرى 16،3 ميلليارد دوللارعا (36 پايىزعا) ۇلعايىپ، 62،1 ميلليارد دوللارعا جەتتى. ءبىرىڭعاي جيناقتاۋشى زەينەتاقى قورىنىڭ اكتيۆتەرى قاڭتار–قاراشا ارالىعىندا 2،6 تريلليون تەڭگەگە (11،7 پايىزعا) ءوسىپ، 25 تريلليون تەڭگە بولعان.

تيمۋر سۇلەيمەنوۆ سونداي-اق جاپپاي سيفرلاندىرۋ بارىسى جانە ۇلتتىق بانكتىڭ سيفرلىق جوبالارى تۋرالى مالىمدەدى. اسىرەسە انتيفرود ورتالىعىنىڭ جۇمىسى مەن ۇلتتىق سيفرلىق قارجى ينفراقۇرىلىمدارىن تەحنولوگيالىق تۇرعىدان ىسكە اسىرۋعا باسا نازار اۋدارىلدى.

اقپاراتقا سايكەس، ۇلتتىق بانك باعا تۇراقتىلىعىن ساقتاپ، ينفلياسيانى ورتا ەسەپپەن 5 پايىزدىق مەجەدە ۇستاپ تۇرۋ ءۇشىن «بارلىق قاجەتتى شارالاردى» قابىلداپ جاتىر.

مەملەكەت باسشىسى ۇلتتىق بانككە:

• ينفلياسيانى تومەندەتۋگە،

• قارجى نارىعىنىڭ تۇراقتىلىعىن قامتاماسىز ەتۋگە،

• سيفرلىق ترانسفورماسيا سەكتورىن جۇيەلى تۇردە دامىتۋعا
  باسا نازار اۋدارۋدى تاپسىرىپ، وسى باعىتتار بويىنشا ءبىرقاتار ناقتى تاپسىرما بەردى.