بۇل - ەلدەگى ەڭ ۇزاق لوكداۋن.
جەكسەنبى كۇنى كەشكە شانحايدا جۇزدەگەن دەمونسترانت ايقايلاپ، پوليسيامەن توبەلەستى. وسىلايشا، ەلدىڭ قيىر باتىسىنداعى پاتەردەگى ورتتەن كەيىن باستالعان قاتاڭ شەكتەۋلەرگە قارسى شەرۋلەر ءۇشىنشى كۇنگە ۇلاسىپ وتىر، دەپ حابارلايدى Almaty-akshamy.kz Inbusiness.kz سىلتەمە جاساپ.
بەيجىڭدى قوسا العاندا، باسقا قالالارعا دا تاراعان ازاماتتىق باعىنباۋ اكسيالارى ماتەريكتىك قىتايدا ون جىل بۇرىن سي سزينپين بيلىككە كەلگەننەن بەرى مۇلدە بولماعان جاعداي جانە دە دەمونستراسيالار ءسيدىڭ "نول-كوۆيد" ساياساتىنان حالىق تۇڭىلە باستاعان شاقتا ءوتىپ جاتىر. ايتا كەتسەك، جۇڭگو ءۇش جىلعا جۋىق ۋاقىتىن الەمدەگى ەڭ قاتاڭ كارانتيندىك شەكتەۋلەرمەن وتكىزدى.
ءۇرىمشى قالاسىنداعى كوپ قاباتتى تۇرعىن ۇيدەگى ورتتەن ادامدار لوكداۋن كەسىرىنەن قازا تاپتى دەگەن بەينەماتەريال الەۋمەتتىك جەلىدە جاريالانعانى سول-اق ەكەن، ەلدە نارازىلىق باستالدى. الايدا ءۇرىمشى شەنەۋنىكتەرى سەنبى كۇنى تاڭەرتەڭ كەنەتتەن باسپا ءسوز ءماسليحاتىن وتكىزىپ، COVID-كە قارسى شارالار ادامداردىڭ ورتتەن قاشۋىنا نەمەسە ولاردى ءتىلسىز جاۋدان قۇتقارۋعا كەدەرگى كەلتىرگەنىن جوققا شىعاردى.
ءۇرىمشىنىڭ 4 ميلليون تۇرعىنىنىڭ كوپشىلىگىنە 100 كۇنگە دەيىن ۇيلەرىنەن شىعۋعا تىيىم سالىنعان. بۇل - ەلدەگى ەڭ ۇزاق لوكداۋن. وسىندا تۇراتىن ۇيعىر ايەل ار اگەنتتىگىنە بەرگەن سۇحباتىندا تامىزدىڭ 8-ىنەن ۇيىنەن دالاعا شىقپاعانىنا، ءتىپتى تەرەزەسىن اشۋعا تىيىم سالىنعانىنا شاعىمداندى.
ينتەرنەت قولدانۋشىلارى قىتايلىق جانە شەتەلدىك الەۋمەتتىك جەلىلەردە جاريالاعان ۆيدەولارعا جۇگىنسەك، كارانتينگە قارسى شەرۋلەر شانحايدان بولەك، نانكين، چەندۋ جانە وڭتۇستىك-باتىستاعى چۋنسين مەن شىڭجاڭداعى ءۇرىمشى، قورلا قالالارىندا دا ءوتىپ، ولاردىڭ كەيبىرىنە مىڭداعان ادام قاتىسىپ، "كوممۋنيستىك پارتيا جويىلسىن!"، "سي سزينپين كەتسىن!" دەگەن ۇراندار كوتەرىلگەن.