الماتى پوليسياسى جاڭا جول ايرىعىندا رەيد جۇرگىزىپ جاتىر

جەرگىلىكتى پوليسيا قىزمەتى باسقارماسىنىڭ اقپاراتىنا سايكەس، قازىرگى كەزەڭدە وقيعا ورنىنداعى ءىس-شارا نەگىزىنەن پروفيلاكتيكالىق سيپاتتا بولادى.

 رايىمبەك داڭعىلىنىڭ بويىندا قالادان شىعا بەرىستە جاڭا جول ايرىعىنىڭ سالىنۋىنا بايلانىستى، كولىك قوزعالىسىن كەزەڭ-كەزەڭىمەن رەتتەۋ جۇمىستارى جۇرگىزىلدى. تاجىريبە كورسەتكەندەي، بۇل اۋماقتا جول قوزعالىسى ەرەجەلەرىن جۇرگىزۋشىلەر دە، جاياۋ جۇرگىنشىلەر دە بۇزادى، دەپ حابارلايدى Almaty-akshamy.kz Polisia.kz-كە سىلتەمە جاساپ.

 «جول قوزعالىسىنىڭ قيىنداۋىن بولدىرماۋ، جول-كولىك وقيعالارىن ازايتۋ ماقساتىندا بۇل ايماقتا پاترۋلدىك پوليسيا جاساقتارىنىڭ جۇمىسى كۇشەيتىلدى. تۇراقتى نەگىزدە ينسپەكتورلار قىزمەت ەتەدى. ولاردىڭ ءبىرىنشى كەزەكتەگى مىندەتتەرىنە پروفيلاكتيكالىق، قۇقىقتىق ءتۇسىندىرۋ شارالارى، ورەسكەل بۇزۋشىلىقتار انىقتالعان جاعدايدا، اكىمشىلىك شارالار قابىلداۋ جاتادى»، – دەدى الماتى قالالىق پد جپقب پاترۋلدىك پوليسيا پولكىنىڭ كومانديرى باۋىرجان حانتەمىروۆ.

ال اكىمشىلىك پوليسيا باسقارماسىندا جاڭا جول ايرىعىندا ءتيىستى جول بەلگىلەرى ورناتىلىپ قويعانىن حابارلادى.

«جاقىن ارادا “سەرگەك” جۇيەسىنىڭ بەينەكامەرالارى ورناتىلادى، ونىڭ كومەگىمەن اتالعان اۋماقتاعى جاعدايدى ونلاين باقىلاۋعا، قوعامدىق جانە باسقا كولىك جۇرگىزۋشىلەرىنىڭ دە، جاياۋ جۇرگىنشىلەردىڭ دە قۇقىق بۇزۋشىلىقتارىن تىركەۋگە بولادى. ايتپاقشى، جولاۋشىلار تاسىمالىمەن اينالىساتىن كاسىپورىندارمەن اۆتوبۋس جۇرگىزۋشىلەرىنىڭ جول قوزعالىسى ەرەجەلەرىن قاتاڭ ساقتاۋى بويىنشا جۇمىستار جۇرگىزىلدى»، – دەپ حابارلادى الماتىنىڭ اكىمشىلىك پوليسياسىندا.