قىتايدا كۇن سايىن اۋرۋدى جۇقتىرعاندار سانى ازايىپ كەلەدى. الايدا بيلىك سانيتارلىق شارالاردى جەڭىلدەتپەي وتىر دەپ حابارلايدى almaty-akshamy.kz
ناۋقاستارمەن ارالاسقان ادامدار دارىگەرلىك باقىلاۋعا الىنادى. ال وزگە ۋاقىتتا بولسا دا ناۋقاس بولعان ورىندارعا بارعان بارلىق تۇرعىندار ۇيلەرىندە كارانتيندە وتىرۋى ءتيىس. ىندەتتىڭ سوڭعى تولقىنان بەرى ءبىر اي ءوتتى. الايدا ەرەجەلەر جەڭىلدەگەن جوق. ارالاسقان ادامدارمەن قاتار ناۋقاستار بولعان جەرگە بارعان ادامدار دا وقشاۋلاندىرىلادى.
قىتايدا ناۋقاستارمەن قاتىناستا بولعانداردى بيگ داتا كومەگىمەن انىقتايدى. بۇل ۇيالى تەلەفوننىڭ ءنومىرى بويىنشا جينالعان دەرەكتەر. كارانتيندەگى ادامداردىڭ ءجۇرىس-تۇرىسىن دا وسىلاي قاداعالايدى.
ءتارتىپ بۇزعاندارعا قاتاڭ شارالار مەن قوماقتى ايىپپۇل قاراستىرىلعان. ءتىپتى ارنايى وقشاۋلانۋ ورتالىعىنا جىبەرۋى مۇمكىن. مۇندا ەكى اپتا وتكىزگەن ادام شامامەن ءبىر مىڭعا جۋىق دوللار تولەيدى. ال ەگەر كارانتين ءتارتىبىن بۇزىپ، وزگە ادامدارعا كوروناۆيرۋس جۇقتىرسا، قىلمىستىق جازاعا تارتىلادى.