پەتروپاۆل قالاسىندا ۇلتتىق ليگانىڭ ايەلدەر كوماندالارى اراسىندا قازاقستان چەمپيوناتىنىڭ 1-تۋرى اياسىندا سۋپەركۋبوك ساراپقا سالىندى، دەپ حابارلايدى almaty-akshamy.kz قازاقپاراتقا سىلتەمە جاساپ.
ەل چەمپيونى، سونداي-اق بيىلعى كۋبوك يەگەرى وسكەمەننىڭ «التايى» مەن قازاقستان كۋبوگىنىڭ ءفيناليسى تالدىقورعاندىق «جەتىسۋ» الاڭعا شىقتى.
سەربيالىق مامان ماركو گرشيچ جاتتىقتىراتىن وسكەمەندىك قىزدار (كوماندا كاپيتانى سانا انارقۇلوۆا) العاشقى پارتيادا باسىمدىلىق تانىتتى – 25:16. ەكىنشى سەتتە ەلەنا پاۆلوۆانىڭ شاكىرتتەرى ەسەپتى تەڭەستىردى – 25:21.
دەگەنمەن بۇدان كەيىن «التاي» قارسىلاستارىنا دەس بەرگەن جوق – 25:19، 25:17. جالپى ەسەپ – 3:1. وسىلايشا وسكەمەندىكتەر بەسىنشى رەت سۋپەركۋبوكتى ۇتىپ الدى.
بۇل – ولاردىڭ بيىلعى ءتورتىنشى جۇلدەسى. «التاي» بۇعان دەيىن چەمپيوندىق كۋبوكقا قوسا ازيا كلۋبتىق بىرىنشىلىگىندە دە ۇزدىك شىققان بولاتىن.
«التاي» جاڭا ماۋسىمدى دا ءساتتى باستاپ، 1-تۋردا جەتى ويىننان كەيىن 21 ۇپايمەن جەكەدارا ءبىرىنشى ورىنعا شىقتى. تالدىقورعاندىقتار 6 كەزدەسۋدەن 15 ۇپاي جيناپ، ەكىنشى ساتىدا قالدى.