ەلىمىزدىڭ دەنساۋلىق ساقتاۋ مينيسترلىگى قىتايدا كوروناۆيرۋس ىندەتىنىڭ ورشۋىنە بايلانىستى قازاقستاندىقتاردان اتالعان ەلگە بارۋدان باس تارتۋدى ۇسىندى، دەپ حابارلايدى اlmaty-akshamy.kz قازاقپاراتقا سىلتەمە جاساپ.
مينيسترلىكتىڭ مالىمەتىنشە، قازاقستاندا قىتايدان كەلەتىن ازاماتتارعا قاتىستى كارانتيندىك تالاپتار مەن شارالاردى قاتاڭداتۋ جوسپارى جوق.
ايتا كەتسەك، بۇگىندە شانحاي اۋرۋحانالارى ناۋقاستارعا تولى. كۇن سايىن مەديسينا مەكەمەلەرىنە COVID-19 بەلگىلەرى بار مىڭداعان ناۋقاس شۇعىل تۇردە تۇسەدى. ولاردىڭ كوپشىلىگى – 65 جاستان اسقاندار، دەپ حابارلاعان ەدى Euronews.
قىتايدىڭ مەملەكەتتىك بۇقارالىق اقپارات قۇرالدارى 25 ميلليون تۇرعىنى بار مەگاپوليس حالقىنىڭ 70%-ى ۆيرۋس جۇقتىرعان بولۋى مۇمكىندىگى ايتىلدى. وسىعان وراي ءبىرقاتار مەملەكەت قىتايدان كەلەتىن جولاۋشىلارعا جاڭا تالاپتار قويعان ەدى. ءوز كەزەگىندە قىتايدىڭ سىرتقى ىستەر مينيسترلىگى كوروناۆيرۋسقا قارسى كارانتين تالاپتارىن كۇشەيتكەن ەلدەرگە ۇندەۋ جاريالادى.
قحر سىرتقى ىستەر مينيسترلىگىنىڭ رەسمي وكىلى ماو ءنيننىڭ مالىمدەۋىنشە، ەلدەر قابىلداپ جاتقان كوروناۆيرۋسپەن كۇرەس شارالارى عىلىمي نەگىزدەلگەن جانە ۇيلەسىمدى بولۋى ءتيىس. سونداي-اق، ادامداردىڭ ءوزارا ارالاسۋى ەلدەر اراسىنداعى ىنتىماقتاستىققا اسەر ەتپەۋى كەرەك.
سونداي-اق، رەسمي وكىلدىڭ ايتۋىنشا، قىتايدا ىندەتتىڭ تارالۋىنا قاتىستى اقپارات ۋاقتىلى، اشىق ءارى زاڭعا ساي تاراتىلىپ جاتىر.