قايرات بورانبايەۆ تاعىلعان ايىپتاردى مويىندامادى.
ونىڭ ايتۋىنشا، "Qazaq Gaz" اق كومپانياسى ءوزىنىڭ بارلىق سالىقتىق، قۇقىقتىق جانە اۋديتورلىق قورتىندىلارىن تاپسىرعان. ولاردى "ۇلكەن تورتتىككە" كىرەتىن Ernst&Young كومپانياسى جۇرگىزگەن. اۋديتورلىق تەكسەرۋ بارىسىندا ەشبىر شىعىننىڭ بولماعانى انىقتالعان. "ازيا گازچۋندجا" ج ش س مەن "Qazaq Gaz" اق اراسىندا ادەتتەگى ازاماتتىق-قۇقىقتىق كەلىسىمشارت جاسالعان.
"مەن تەك ("ازياگازچۋندجا" ج ش س) اكسيونەرىمىن جانە مەنى اكسيونەر رەتىندە قاماۋعا الدى. ءبىزدىڭ حولدينگتە بارلىق كەلىسىمشارتتاردى، بارلىق قارجى-شارۋاشىلىق قىزمەتتى باس ديرەكتور جۇرگىزەدى. كومپانيا گاز ساتىپ الىپ، "Qazaq Gaz" اق كومپانياسىنا ساتقان، كەلىسىمشارتتا ساۋدا-ساتتىققا باعا فورمۋلاسى بولعان. وعان سايكەس "قازترانسگاز" اق (ءقازىر "Qazaq Gaz" اق) ءار توننادان 10 دوللار، ياعني ساۋدا-ساتتىق سوماسىنان 20 ملن دوللار پايدا تاپقان. بۇدان بولەك بۇل گاز كولەمىنىڭ بارلىعى قىتايعا جونەلتىلدى، ياعني كومپانيا تاعى 220 ملن دوللار پايدا تاپتى"، - دەدى بورانبايەۆ.
سونداي-اق، ول كومپانيا بارلىق تاسىمالداۋ شىعىندارىن تولەگەنىن ايتتى.
"ءقازىر مەن وسى قۇجاتتاردىڭ بارلىعىن زەرتتەپ كوردىم، بىزدە ءتۇرلى كەلىسىمشارتتار كوپ بولعاندىقتان، وسىعان دەيىن، ارينە، بىلمەدىم. الايدا، بىزگە بۇدان باسقا ايىپ تاعىلماعاندىقتان، مەن ونى مۇقيات زەرتتەدىم. "ازياگازچۋندجا" ج ش س" تاسىمال قۇنى ءۇشىن عانا 125 ملن تولەگەن. بۇل "Qazaq Gaz" اق ىشىندەگى ترانسپورت كوممپانياسىنىڭ كىرىسى"، - دەدى قايرات بورانبايەۆ.
تەرگەۋ مالىمەتتەرىنە سايكەس، وسى ءىس بويىنشا كۇدىككە ىلىنگەن قايرات بورانبايەۆ، رومان ناحانوۆ جانە تايىر جانۇزاقوۆ 2019 جىلى وزدەرىنىڭ باقىلاۋىنداعى "ازياگازچۋندجا" ج ش س ارقىلى گاز تاسىمالداۋ كەزىندە "Qazaq Gaz" اق ۇلتتىق كوممپانياسىنىڭ قارجىسىن جىمقىرۋ سحەماسىن جۇزەگە اسىرعان. ناتيجەسىندە جىمقىرىلعان 14،5 ملرد تەڭگەنى زاڭدى كاسىپكەرلىك قىزمەتتەن تۇسكەن پايدا رەتىندە ديۆيدەندتىك تولەممەن ءبولىپ بەرۋ ارقىلى زاڭداستىرعان.