شىمكەنتتە قىتايدىڭ دارىلىك ونىمدەرىن تۇتىنعان 54 جاستاعى تۇرعىن جانساقتاۋ بولىمىنەن ءبىر-اق شىققان. وعان اللەرگيالىق شوك دياگنوزى قويىلعان، دەپ حابارلايدى اlmaty-akshamy.kz Otyrar.kz-كە سىلتەمە جاساپ.
27 قاراشادا 54 جاستاعى ايەل №2 قالالىق اۋرۋحاناعا جەتكىزىلدى. ناۋقاستىڭ جاعدايى اۋىر بولعاندىقتان، ول جانساقتاۋ بولىمىنە جاتقىزىلدى. ايەلدىڭ بۇكىل دەنەسىندە ءىرىڭدى بورتپەلەر پايدا بولعان. دەنە قىزۋى كوتەرىلىپ، باسى اۋىرىپ، جۇرەگى اينىعان.
"ناۋقاس قىتايدىڭ ءتۇرلى دارىلەرىن ءىشىپ، جاقپا مايلارىن قولدانعان. ول زاتتاردى تۇتىنعانىنا ءتورت كۇن بولعاندا اللەرگيا بەلگىلەرى بايقالعان. اۋرۋحاناعا جاتقىزۋ كەزىندە ايەلدىڭ جاعدايى اۋىر دەپ باعالاندى. دەنە تەرىسىنىڭ 90% زاقىمدانعان. بەت پەن دەنەسى ءىسىپ كەتكەن"، - دەيدى دارىگەر.
ناۋقاس ەكى اپتا بويى جانساقتاۋ بولىمىندە ەم قابىلداعان. ونىڭ قانىنا گەموفيلتراسيا جاسالىپ، تازارتىلعان. ناتيجەسىندە ايەلدىڭ جاعدايى جاقسارىپ، تەرىسى تولىعىمەن قالپىنا كەلگەن.