ۆاديم كۋرالەس مارە سىزىعىن ءبىرىنشى بولىپ قيدى.
قازاقستاندىق بياتلونشى ۆاديم كۋرالەس لەيك-پلەسيد (اقش) قالاسىندا ءوتىپ جاتقان قىسقى ۋنيۆەرسيادانىڭ چەمپيونى اتاندى، دەپ حابارلايدى اlmaty-akshamy.kz قازاقپاراتقا سىلتەمە جاساپ.
ۆاديم كۋرالەس 15 شاقىرىم قاشىقتىقتا جەكەلەي سىندا مارە سىزىعىن ءبىرىنشى بولىپ قيدى.
جارىس جولىنا 16-ىنشى بولىپ شىققان ۆاديم نىسانا كوزدەۋدەن ءبىر رەت قانا (0+1+0+0) ءمۇلت كەتىپ، 42:37.4 مينۋت ناتيجە كورسەتتى.
نورۆەگيالىق بياتلونشى ەريان موسەنگ قازاقستاندىقتان 42،6 سەكۋندقا قالىپ قويىپ، ەكىنشى ورىنعا يە بولدى. فرانسيالىق اكسەل گارنە (+1:16.5) ۇزدىك ۇشتىكتى تۇيىندەدى.
قازاقستاندىقتاردان بۇگىن سونداي-اق الەكساندر مۋحين، كيريلل باۋەر جانە بەكەنتاي تۇرلىبەكوۆ وسى قاشىقتىقتا سىنعا تۇسكەنىمەن، ولار جۇلدەگە ىلىگە المادى.
وسىلايشا، قازاقستان قورجىنىنا العاشقى جۇلدە – التىن مەدال ءتۇستى.