قىستاي كيگەن قالىڭ كيىمدەردى جينايتىن ۋاقىت كەلدى.
كەلەسى قىسقا دەيىن كيىمدەر جاقسى كۇيدە بولۋى ءۇشىن ولاردى دۇرىس تازارتۋ جانە ساقتاۋ ماڭىزدى. جاڭا ماۋسىم الدىندا قىسقى گاردەروبتى رەتتەۋگە كىرىسكەن بولساڭىز، سىزگە قاجەت بولاتىن بىرنەشە بازالىق ەرەجەلەر بار، دەپ حابارلايدى Almaty-akshamy.kz Elorda.info-عا سىلتەمە جاساپ.
1. ماۋسىم سوڭىندا سۇيىكتى پالتوڭىزدا ۇساق اقاۋلار بار-جوعىن تەكسەرىڭىز. مىسالى، ىلگەكتەرى بوساپ قالعان نەمەسە قالتانىڭ ءىشى جىرتىلعان بولۋى مۇمكىن. ولاردى كيىمدى سالىپ تاستار الدىندا جوندەپ نەمەسە تىگىپ قويعان ءجون. ەگەر ماۋسىم بويى پالتونى ءجيى كيگەن بولساڭىز، ونى حيميالىق تازالاۋعا تاپسىرۋعا بولادى.
2. پالتونى بۇكتەپ جيناماي، كيىم ىلگىشكە ءىلىپ ساقتاعان دۇرىس. پالتو ءپىشىنىن جوعالتپاس ءۇشىن وعان اۋا وتەتىن ماتا قاپ پەن ۇشتارى دوڭگەلەكتەلگەن جالپاق كيىم ىلگىش العان جاقسى.
3. قىسقى كۇرتكەنى سالىپ تاستار الدىندا مىندەتتى تۇردە ونى جۋىپ الۋ كەرەك. كۇرتكە زاتتاڭباسىنداعى كۇتىمگە قاتىستى اقپاراتتى زەرتتەڭىز. سەبەبى كەي كۇرتكەلەردى كىر جۋعىش ماشيناعا جۋۋ ۇسىنىلمايدى. كيىم كەپكەنشە، ونى اراسىندا سىلكىپ الىپ تۇرىڭىز، ايتپەسە، مامىق ءبىر جەرگە جينالىپ قالۋى مۇمكىن. كۇرتكەلەردى بۇكتەپ جيناپ ساقتاۋعا بولادى، ءبىراق قاتتى تىعىزداپ تاستاۋ ۇسىنىلمايدى. كۇرتكەلەردى دە اۋا كىرەتىن ماتا قاپتا ساقتاعان ءجون.
4. جۇننەن توقىلعان جەمپىرلەردى ءار كيگەننەن كەيىن جۋۋدىڭ قاجەتى جوق. ونى كيىمگە ارنالعان ششەتكامەن تازارتىپ، بالكونعا جەلدەتىپ الۋ جەتكىلىكتى. توقىلعان كيىمدەردى ءجيى جۋساڭىز، ولار جىلدام توزىپ، تۇكتەنىپ، ءپىشىنىن جوعالتىپ الادى.
5. كۇيە كوبەلەك كيىمدەرىڭىزدى بۇلدىرمەس ءۇشىن 2-3 ايدا ءبىر شكافتىڭ ءىشىن شاڭسورعىشپەن سورىپ، ىلعال شۇبەرەكپەن ءسۇرتىڭىز. سودان سوڭ شكافتىڭ ەسىكتەرىن اشىپ قويىڭىز: جاندىكتەر كۇننىڭ كوزىنەن قورقادى.
6. اياق كيىمدى سالىپ تاستاماس بۇرىن ونى جاقسىلاپ تازارتۋ كەرەك: تابانىن سۋدىڭ استىندا جۋىڭىز، ۇلتاراقتى ىلعال شۇبەرەكپەن ءسۇرتىڭىز جانە اياق كيىمنىڭ ۇستىنە ارنايى تازارتاتىن كوبىك جاعىڭىز. اياق كيىمدى تازارتىپ بولعان سوڭ، ونى جاقسىلاپ كەپتىرىپ، كرەم نەمەسە ماي جاعىڭىز.