ءا.قاستەيەۆ اتىنداعى مەملەكەتتىك ونەر مۋزەيىنىڭ ورتالىق كورمە زالىندا بالالار جىلىنا وراي «كەمپىرقوساق» اتتى رەسپۋبليكالىق كورمە اشىلادى. بۇل كورمە «بابالار اماناتى» جوباسى اياسىندا قازاقستاننىڭ كوركەم ەڭبەك ءپانى مۇعالىمدەرىنىڭ قاتىسۋىمەن وتەدى.
«بابالار اماناتى» جوباسىنىڭ ماقساتى – رەسپۋبليكامىزداعى بۇكىل كوركەم ەڭبەك ءپانى مۇعالىمدەرىنىڭ باسىن قوسۋ، بولاشاقتا وسكەلەڭ ۇرپاقتىڭ تالىم-تاربيەسى مەن ءبىلىم نەگىزىن ۇشتاستىرۋ، سونداي-اق ءارقيلى جانرداعى تۋىندىلاردىڭ قىر-سىرىن تاريح تاعىلىمىنا تەرەڭ بويلاتا وتىرىپ، وسى ۇستازداردىڭ ارقاسىندا كورەرمەنگە جەتكىزۋ. بۇل جىل پرەزيدەنتىمىز ق.توقايەۆتىڭ ۇسىنىسىمەن «بالالار جىلى» دەپ بەلگىلەندى.
شىعارماشىلىقپەن اينالىساتىن ەلىمىزدىڭ تۇكپىر-تۇكپىرىنەن قاتىساتىن ۇزدىك 80-نەن استام ۇستازدىڭ تۋىندىلارى قويىلدى. سوناۋ ەستە جوق ەسكى زاماننان بەرى كەلە جاتقان ۇلتتىق ونەرىمىزدى وسكەلەڭ ۇرپاقتىڭ بويىنا دارىتىپ، بابالارىمىزدىڭ كيەلى ونەرىن عاسىردان-عاسىرعا جەتكىزىپ، تاريح بەتتەرىندە التىن ارىپپەن جازىپ قالدىرۋ – ۇستاز مىندەتى، ۇرپاق پارىزى دەپ بىلەمىز.
بيىل «بابالار اماناتى» ۇلتتىق جوباسىنىڭ قۇرىلعانىنا ءۇش جىل تولادى. جوباعا ق ر سۋرەتشىلەر وداعى، ق ر ديزاينەرلەرىنىڭ ەۋرازيالىق وداعى، قولونەر وداعى جانە شىعارماشىلىقپەن اينالىساتىن قازاقستان رەسپۋبليكاسىنىڭ كوركەم ەڭبەك مۇعالىمدەرى كىرەدى. ولار تۇركيا، گرەسيا جانە ورتالىق ازياداعى حالىقارالىق كورمەلەرگە ۇنەمى قاتىسادى.
قاناعات كودەكوۆ – «بابالار اماناتى» جوباسىنىڭ جەتەكشىسى، كۋراتورى، «ۇزدىك پەداگوگ–2021» جەڭىمپازى، ق ر سۋرەتشىلەر وداعىنىڭ مۇشەسى، «بابالار اماناتى» حالىقارالىق جانە رەسپۋبليكالىق كوركەم ەڭبەك پەن كاسىبي سۋرەتشىلەر جيناعىنىڭ اۆتورى. «بابالار اماناتى» – قازاقستان رەسپۋبليكاسىنىڭ حالىقارالىق كاسىبي سۋرەتشىلەرى مەن تالانتتى كوركەم ەڭبەك مۇعالىمدەرىنىڭ ۇزدىك شىعارمالارىنىڭ جيناعى. سونداي-اق، ءال-فارابيدىڭ 1150 جىلدىعىنا، اباي قۇنانباي ۇلىنىڭ 175 جىلدىعىنا، مۇقاعالي ماقاتايەۆتىڭ 90 جىلدىعىنا، ق ر تاۋەلسىزدىگىنىڭ 30 جىلدىعىنا جانە ت.ب. ارنالعان شىعارمالار جيناقتارى جارىق كوردى.
كوركەم ەڭبەك پاندەرىن وقىتاتىن رەسپۋبليكانىڭ بارلىق وڭىرلەرىنەن كەلگەن 800-دەن استام ۇستاز، شىعارماشىل پەداگوگ «بابالار اماناتى» جوباسىندا رەسپۋبليكالىق جانە حالىقارالىق دەڭگەيدە پەداگوگيكالىق ونەردى ناسيحاتتاۋ ماقساتىندا بىرىكتى. جوبا مۇشەلەرى ەلىمىزدە ءوتىپ جاتقان مادەنيەت كۇندەرىنە بەلسەندى قاتىسىپ، كورمەلەر وتكىزەدى.
قازىرگى ۋاقىتتا ەلىمىزدىڭ پەداگوگيكالىق قوعامداستىعى وسكەلەڭ ۇرپاقتى ۇلتتىق بەينەلەۋ ونەرىنىڭ قۇپيالارى مەن قىر-سىرىنا ۇيرەتۋ ءۇشىن تىنىمسىز ەڭبەك ەتۋدە ونەر ارقىلى ولاردى قازىرگى زامانعى كوركەمدىك باعىتتارمەن تانىستىرادى، ەستەتيكالىق تاربيەنى، سۇلۋلىقتى دۇرىس ءتۇسىنۋدى قالىپتاستىرادى. قازاقستاننىڭ ۇلتتىق ونەرىن ناسيحاتتاۋ بويىنشا جۇمىس جۇرگىزۋدە.
كورمەنى 10 مامىرعا دەيىن تاماشالاۋعا بولادى